Seminar Paper

A brief note on Maring traditional clothes presented by Mr. M. Kodaarkhum during One-day Seminar Programme organized by Maring Napuiya Yinglam held on the 24 th March 2011 at Meipou Community Hall

Tribe khad woiyanung aaiyei sak mukana(identity) leirou, sak mukana makkanung tribe khatme toubi loumakpou. Tribe khat woinei sak mukanaa chungni kalei. Yaarabbei tlakra lil woini Tlou (language) ,youkanaa (custom), chaakaril (culture) ,chaasamkaril (tradition0 ,phirul, sei khatri laa aarabbei karui. Sak mukana aarabbei tlakra tlou woini yunbi ,laa khadri sei  woini sakbi khanaara mayekyertha, kalei. Pudrabbei tlakra limmei phi aa beimak lil woi khat.

      Maringnga tribe khad woina ngamrou aaiyei matik chaa khatri waadmak youkanaa, chaakaril khadri chaasamkaril kalei. Khadlaangra youkanaa ,chaakaril khatri chaasamkaril kouwei toubi ngaainung daawanung heiya khumrri kalaairi nimak.Yunkaril waahei khayumtam aari lum serrou khadni khadda namphabrilbi lakhouril yaamakkei kalei. Angtu ramphaarou worldlei sing hei kounakni maalnamak mod laai laai pibi kalei kaani muphaa. Kouwa kouwa woiyanungkhi Maringnga limni chaasamkaril phirulrabbei (traditional clothes) ngamrou thilhaaknung daawanungri , chaasamkarillei phirul kounakchung kaleiyei tlakra  lil woiyei Maringnga rung hudra khalang silchang phi heiya kaani Maringnga phi toubi lourou daa.Tlaaipang thimi lim kantangngei yekkar phi naammaphaaiyei kayekthil,khaankanril duini yaarui lhaakkaril heiya , kaluri khaannei niyom aai aaiyei laai laai leikaril heiri. Khudtam woini yaaruira khaannei ,mid dannei niyom , taphuwei laapaakra , howira khadri naayelra phaaipu khaangnei niyom ,kounakkei maaibangra urthudbi khoukurra. Lim kantangei taphu, yaarui diuni khan kalei heiya ,laai laaiyei niyom heini aai aaiyei sak mudbi kalei.

Kounak lummei Maring ngayei phi limrap urthudkurra:-

Kum masing thichangmak machaa kounakkei maaibangra urthudbi khoukurra.Heilummei urthudbi khoukur duini khambi ubbi leikur heini maringngayei sak mudbi leikurra . Yunkarillei daakra chim khad woini yaalaang  Mamcham leipaakra paallei lumrou khowei napuiyaarapni thakrei yaalaang  khadri daakrei yaalaang tou khanitam thukni khaaithudbi phiyei lim (makhal) lhungni yekthuddurnei kanril (history) kalei. Heilummei yekthutkur philimrap heini kangleipaakkei karung leipaakra chaan  kounakkei chaanrabra , “ Maring Ponden” tou munaabi leikurra .Maringnga napuiyarabbei yekthudkur philimrabni tlangngaainei ngamrou kangleipaakkei karung leipaakra –lum kounak lhaani manchung phi khat man chung phi khad woini yrengchaakur. “Maring ponden “aani beimak man taang khad woina ngamrou pud khaddei man kounak  woirou tou ngaiyei lumrou Maring Ponden khaddei man woirou markhenaayei kanril ( history) kalei.Maring Ponden tou mukana aa kounak phi woirou tou  kanrillei throwei maaiya phaabni laambi laadbi yukthiyei lumrou, cheb chaani yunchangmak woiyanungkhie, yaaruilhaak, langphaai khadri khukngallu aarabbei tlakra nimakni deiri laaini laamphaamak.

Heiniri angtuwei maringnga kulrulra ( society ) woithaamak siyaa kansaayei philim laaiyei urthudri Maringnga khulbungnga toumaang nimakni tlangaai lamra urlhaakri woimakrou. Maringnga lima a kum machaayei chaangchadra loupaal nimakkura , lising lisingngei chaangchadra kadpallbi leikurra .Maringnga khulbungnga kalaallei lamra ruilhaakbi khulbungngei judas woipimak. Angtuwei kherrei kadsimthud lim khad woini tribebei phirul kadsimthud woiyanungri maringnga khulbung aa makhub yel woirouwa. “Hotan naaimakni mantham changmakrou, hotum naaimakni chunthaamakrou” mupilak.

Phicher khadri phicham:-

Maringnga khulbungngei  youkanaa daakra phiyei limra phicher khadri phicham toubi khanitam thukni loukhaaithudbi loukalei . Aarou phicham toulanung taphu sukmak heiya nimak, napui nahaani ningsun rawai yarengtha tou mukanaa . Khadra, “cher” or “cherkanaa” tou aayaa tlangaaimak khadri mardunnei modra yunkaril . “Cher” tou wahei aakou kalhunni “Khukngallu” aaya lum  kounak lhaani phichermeh toubi napui nahaa muyermakni , thiryermakni rathulla phumbi khoukur.Meikuk laarari yulthak yuldaak phirul phisam waadmak, manchung phi “Khukngallu” ubchang -bchangmak,singkanaayei laari lousaana loukalei. Aarou keiyei marthing thud kaniri, “Khuingallu/Khoingallu” aayei kadyouna chimmei minlamri, “Khukngallu” aani chimbi kalei. Heini chimmei minna ungpi khadri yunpilanang Dunpuwei kayaa woirou.

               Phiyei minlam chim chimmakei maram kaleiyei ngamri kum machaa koumakkei maibangra yang/lhung “Khukyul” leipaak phunnurkhou. Khukyul leipakraa khuk yaaolummei phutul khalna daarna phi heiya khuk-ngalna phi “Khukngallu” toubi munaa karil duini ungkur. Maringngayei youkanaayei daakra thui wariyei se-khasuwa lhimnaa pudchang khad woina khounei hakdou khadri napui nahaani ub,thir yamaak touwei waari samsundaa kalei.Aani chimmei ngam woibi phicher tou mukaanaa. Khadlhangra hunak khani khuingallei khaannei maong tambi yekkur phi toubi kayun aani chimri woithaamak kalei, phiyei maongri khuingallei nimakkanang dei deiyei ma-ongnga loubi yekkurkhe kayaa, heitou yekthudkur phiya lhoubam khadra chalnaamakni hek phicher woiyerri youkanaayei waarira chimmei hotumri woithaamakrou.

                Angtu Maringnga khulbungei phaalphei bam churbi kaleirab duini douwei kadsunbi kalei limmei ruilurab, Maringngayei youkanaa khadri chaakarrillei khaman paaraayei thromaai khubkhalna khin hungngurra heiniri, angtu tou niyei nungmidni rawaaiyei sumtumra ho kaarlhaakbangnung neiyei yinglammei kunbi kalei waaidonna rumtungbi sokhoupilak toubi Dunpuwei minra buchaalei koumak laadbi kalei youkanaayei khadri chaakarillei khaman paaraayei thromaaini khubkhalkarni   lamrikar woiyanungri hanui kalhengni laadphaabikhe mumakkarou heini, ngam woibi hillei hungroukayou yuthum chaathunrabni angtuwei khulbung phaalphei ruibi kalei ruilurabba duini phaalphei bammei upaarabba thru khaangthud suimakrou. Lummei khin serrou Maringnga limni  tlaaipang doura thang al woiyasu.

             Aarou khammasi.