Maring Book No. 1

MARINGA LAA

(PART-1)

Angson Modam Emmanuel

Year Of Publication : 2008

No Of copies : 200

Edited By : Angson Modam Emmanuel

Printed At : Stoney Computers

Tangkhul Avenue

Opposite Khuman Lampak

Preface

Awani keiyei lamkri markumbi mayekur heirou namthutkur Maringa Kulyommei (Traditional Folk Songs) laa rapbei laatho lailik khatni na nammei bamra malanthutlei. Maringa Kulyo laa rapri laarung lairirei hoiyabini , laa rapbei karlhikrilkhi thari leirou heiya karlhikkril heiwari yaa laarung rapbei kring, lhikhi lailainei ngamrou heisi laarapkhi beibeiri karlhikril klei.Heiyanungkhi laa rap heiri Maringa kulyomrapbei hangra ai aiyei tloubam hilthungni namma saarillei.

Markumlhakkur laa rap heinungtlim Laarung rapya keiyei hakarao-nungkangai shunthutlei. Minkhoini pal lanungri Ch.Mehan, waithou phunal khunou ya beimak chouni mathangpilei.

Ngamri aani laatho aawaya mayethutrbi namthutnara tangni trungpikur.

Laarap awaya proof reading toupikur Rev. K Moses (O T Translator) aayakhi

Beimakni nungkangai shunthutlei.

Angson Modam Emmanuel

Khungkaapnei Laa

Laa No.1 : Lamallei thimi phulnei Laa

(Li) Keini kholamalpirou

Shang Shitan thok ke

(Dou) Shang Shitan thok ke

Shang Shitan phulle

Laa No.2 : Malaa Kaapnei Laa

(Li) Thatl matting thal matting

Rathal matting yaowe

(Dou) Rathal matting yaowe

Kantro chunga hanlung sai ye

Laa No.3 Khul kuinei Laa

(Li) Choi ka se….choi ka se

Ahlem kante khowa

(Dou) Ahlem Kante khowa

Rapui rahong kunga

Laa No.4 Nuinanungei Laa

(Li) Wawalo keitolmeirou Nui-yase

(Dou) Keitol meirou nuiyase

Tolkar yanrou nuiya se

Laa No 6 Thirrui Thounei Laa

(Li) Keishangbo

Thirle thirshang lokaiko

(Dou) Lokmakui

Thirle thirshang lokmakui

Laa No .7 Liklha Bongbarnei Laa

(Li) Lou Unlo

Bhongbar Reithon Lou un lo

(Dou) Bhongbar Reithon Lou un lo

Likla Reithon Lou Un Lo

Laa No 8 Wachangnei Laa

(Li) Changa Se

Yacheem Ya Lou Changa se

(Dou) Ya Cheem Ya Lou Changa se

Minshella cheem Changa Se

Laa No 9 Cheemwai Wachangnei

(Li) Thul thui se Thul thui se

Ya cheem Ya Lou thul thui se

(Dou) Ya Cheem Ya Lou thul thui se

Minshella cheem thul thui se

Laa No 10 Wakarkhulnei Laa 1

(Li) Shimlei Nu

Reibo moh

(Dou) Reibom thingta lei hoi ye

Shimna lamna thrawe

Laa No 11 Wakarkhulnei Laa 2

(Li) Shangbo

Tontroi Ommo Ommake

(Dou) Om Lei Ne

Shou Kin Yaowe Thra We

Laa No 12 Thulnei Laa

(Li) Shalla se

Kisam Dangnu shalla se

(Dou) Kisam Dangnu Shalla se

Yawo Kisam Shalla se

Laa No 13 Lam Loukhainei Laa

(Li) Shalroiwo Tinroiwo Ya Hoi

(Dou) Leinung thora Changa Se

Tinroiwo Ya Hoi

LAM LAINEI LAA

Laa No 14 : Yulso Lam Lainei Laa

(Li) Leh hoi Ya He

(Dou) Leh Eh Hoi Ya

Laa No 15 Phalbung Phalnei Kwaangla Diknei Laa

(Li) Swang Ne Kumma Ne

Kumma Reithon Thowa Ne

(Dou) Kumma Reithon Thowa Ne

Swang Thelthok Thowane

Laa No 16 Khawang Lananung Laa 1

(Li) Swang Thilthuk Thowadi

Sawang Kei Laa Nanungei

(Dou) Sawang Keilaa Nanungei

Thraisa Pon Lhou Langngeinung

Anu Pon Lhou Langngeinung

Laa No 17 Khawang Lananung Laa 2

(Li) Oh Oh He Ya Oh Hai He Ya He Ya He

(Dou) Oh Oh He Ya Oh Hai He Ya He Ya He

Laa No 18 Yuisho Lam Yunei Laa

(Li) Thilham Punsher Koura Don

Heimol Lungon Yuwalo

Molkanthring Rou Yuwalo

(Dou) Molkanthring Rou Yuwalo

Lungper Lhangmer Danleine

Hairei Yuman Thangngeinung

Laa No 19 Paar Laanei Laa

(Li) Heklaro Heklaro

Reilhim Paarlhim Heklaro

(Dou) Reilhim Paarlhim Heklaro

Sangphai Reithou Heklaro

Laa No 20 Paar Naanei Laa

(Li) Thetlaro Thatlaro

Reilhim Paarlhim Thetlaro

(Dou) Reilhim Paarlhim Thetlaro

Thetkam Chalo Yammoyo

Laa No 21 Thambo Naanei laa

(Li) Thangrei Te Inn kayaam Bung

Kounung Kayaam Bunglhoukhei

(Dou) Kounung Kayaam Bunglhoukhei

Shorlha Manmangnala Ne

Laa No 22 Sham Trulnei Laa

(Li) Sanareipaar Sham Khoirei

Kounung Kayaam Bunglhoukhei

(Dou) Kounung Kayaam Bunglhoukhei

Trunsham Hankelna Wane

Laa No 23 Khui Manemnei Laa

(Li) Kolaan Yum Keiyei Laa Narou (2)

Khuingal Lhouchu Danglei Ne (2)

(Dou) Khuingal Lhou Chu Dangrine

Yuman Yollo Yumba Rol

Laa No 24 Khulbam Munanung Laa

(Li) Lhou Un Thonglo Yumba Rol

Hei Mol Lungrou Yong Lei Ne

Molkan Thringrou Yongleine

(Dou) Molkan Thringrou Yongleine

Heitou Pokpi Cheem Palrou

Khoi Khoi Hungshon Raram Ne

Laa No 25 Cheithuk Thrummei Laa

E Hoi Ni Ya Lo Hoi Le Ya Lo Ne E Hoi Ya lo He

Laa No 26 Uipu Laa

(Li) Shilran Keini Nuiyanung

Kousi Keiyan Nuirou Toh

(Dou) Kousi Kei Yan Nuirou Toh

Muiring Nuini Nuirou Me

(Li) Shilran Keini Nui yanung

Uphun Thokni Nuirou Ne

(Dou) Uphun Thokni Nuirou Ne

Leinaang Thokni Nuirou Ne

Laa No 27 Nuilak Hungnei Laa 1

(Li) Lamphalle Lamphalle

Keikho Lhangyun Lamphalle

(Dou) Keikho Lhangyun Lamphalle

Samu Khonglhum Lamphalle

Laa No 28 Nuilak Hungnei Laa 2

(Li) Hongleiya Hongleiya

Keikho Dangbi Hongleiya

(Dou) Keikho Dangbi Hongleiya

Lhou Un Thilo Thraisa Yo

Laa No 29 Nuilak Hungnei Laa 3

(Li) Lamhuiyo Truimaklo

Keini Reitheng Khoulei Ne

(Dou) Keini Reitheng Khoulei Ne

Sana Reitheng Khoulei Ne

Laa No 30 Karkhulnei Laa 1

(Li) Tedunran Wo Tedunran Wo

Thinglo Lamloh Tedunran Wo

(Dou) Thinglo Lamloh Tedunran Wo

Thingma Thingkan Sayaowane

Laa No 31 Hungkarkhulnei Laa 2

(Li) Hohsho Keilhou Yubirou

Yukhong Leine Yupao Leine

Ho E ya

(Dou) Yukhong Leine Yupao Leine

Lhouma Khumloh Shangyaisilla Ho E Ya

Laa No 32 Nuilak Hungnei Laa

(Li) Hongleiya Hongleiya

Keikho Dangbi Hongleiya

(Dou) Keikho Dangbi Hongleiya

Shangse Reirom Sowaneh

CHA LAA

Laa No 33 Cha Laa Lamlainei Laa

(Li) Wangkho Lam Lai

Ye Kho Lam Lai Ya

Oh Wanglho Lam

Laipi Roi Ye

(Dou) Wangkho Lam Lai

Ye Wangkho Lam Lai

Oh Wangkho Lam

Therpiroi Yo

Laa No 34 Molbung Laa

(Li) Molbungngo Shangngo Ya

Oh Molbung Shangngo Ya

Oh Thilyaorai Ye

Laa No 35 Chaati Thuknei Laa

(Li) Molbung Ngo Shangngo

Oh Molbung Shangngo

Hulyao Raiye

(Dou) Molbung Ngo Shangngo

Oh Molbung Shangngo

Oh Shannakshon Ne

Laa No 36 Chaakhung Manpaaknei Laa

(Li) Molkan Yerru Shangngo

Shang Nang

Khongki Warreh Ye

(Dou) Shangngo Nang khungki Warreh

Shangkhung Tek Nang Khungkhi

Laa No 37 Miyei lan Shimnei Laa

(Li) Khuishung Nang Karhirmakloh

Keimal Lan Koudun Makne

(Dou) Keimal Lan Koudun Makne

Shangpaar tui koudun Leine

Laa No 38 Chaa Aat Sungnanei Laa

(Li) Pao Wo Yulat Pa Wo

Kei Maiyung Hei Un Thunglo

(Dou) Kei Mai Yung Kan Deh Lei Ko

Laa No 39 Mophom Rungngei Tul Shilnei Laa

(Li) Mophom Rungngei Shim Yu Shil

Neirung Shilkarkaowokhou

(Dou) Keirung Shilkarkao Makne

Bhor Khing Le Neiyei Bomnarou

Marthrum Malankhola Neh

Laa No 40 Anpal Yernei Laa

(Li) Mophom Rungngei Saiki Yer

Neirung Shilkarkaowokhou

(Dou) Keirung Shilkarkao Makne

Bhorkhing Lehye Neiyei Bomnarou

Marthrum Malanklaneh

Laa No 41 Chaasang Pomnei Laa

(Li) Mophom Rungngei Shangra Pom

Shangran Toi Keira Pom

Kousi Keiyan Hongrouwo

(Dou) Kousi Keiyan Hongdou Toh

Koucheng Chunni Hongdou Ne

Laa No 42 Chathum Pomnei Laa

(Li) Mophom Rungngei Shangra Pom

Shangman Sham Keira Pom

Kousi Keiyan Hongrouwo

Laa No 43 Chaa Yaapnei Laa

(Li) Teh Yoh Muilemshillo

Kandeh Shangsho Shangyaapbase

(Dou) Kandeh Shangsho shangyaapbase

Karkhu Doudou Shangyaapbase

CHEEMSHA NEI LAA

Laa No 44 Khonloi Laa

(Li) Oh Oh Yo Thonnareh

Immunna Thonnareh

(Dou) Immunna Thonnareh

Phailoiya Thonnareh

Laa No 45 Thing Marshiknei Laa

(Li) Thing Marshikke

Thinglimma Marshikke

(Dou) Thinglimma Marshikke

Rohlim Ma Marshikke

Laa No 46 Cheem Yungbe Boonnei Laa

(Li) Thing Kanthou Reh

Thinglimma Kanthoureh

(Dou) Thinglimma Kanthoureh

Rohlhim Ma Kanthoureh

Laa No 47 Loongbangnei Laa

(Li) Ngamba Komaishang

Lhongyen Damloh Hui Ha

(Dou) Ngamba Komaishang

Choi Chi Choi Cha Hui Ha

Laa No 48 Thimi Ungnei Laa

(Li) Wah Wah Loh Wah Wai Loh

Waayum Ruitan Wa Wai Loh

(Dou) Wah Wai Loh Ruitan Wa Wai Loh

Shikhoi Roiyo Wawailoh

Laa No 49 Lu Shunei Laa

(Li) Keitrai Shamsho Karkhoiye

(Dou) Keitreye Shamsho Shamnalleh

Laa No 50 Shamphon Lepnei Laa

(Li) Leplaiko Rangmei Shamphon Leplaiko

(Dou) Lepleineh Lepni Lepthum Lepleineh

Laa No 51 Phikham Lepnei Laa

(Li) Lepleiko

Treiyei Karkhu Leplaiko

(Dou) Leplei Hui

Treiyei Karkhu Leilei Neh

Laa No 52 Thimi Shimnei Laa

(Li) Shem Shemthoi Karngei Yei

Yai Lah Shemthoi Karngei Yei

(Dou) Yailah Shemthoi Karngei Yei

Arhmom Shemthoi Karngei Yei

Laa No 53 Nuinei Laa

(Li) Throm Yermeh Throm Yer Meh

Throm Khum Yermeh Throm Yer Meh

(Dou) Throm Khum Yermeh Throm Yermeh

Undol Yer Meh Thromyermeh

Laa No 54 Chaa Le Daar Laa

(Li) Shanghangnge Raatniye

Shangchan Hangnge Ratniye

(Dou) Shel Hangnge Raatniye

Shalchan Hangne Ratniye

Laa No 55 Waalah Upa Laa

(Li) Tuikarchum Wayumrei

Tunilhou Manmak Nek

(Dou) Tu Ni Lhou Man Makneyo

Khalteh rungngei Kiman neh

Laa No 56 Wangshang Bangnei Laa

(Li) Koklontui Koklhontui

Koklhontuithon Selommeh

(Dou) Semakke Kalui Tehteh Phombiyo

Laa No 57 Khonloiyei Lamthom Khalnei Laa

(Li) Rolloh Theirolroi Yahoi

(Dou) Chingshang Darbi Raatniya

Mayang Holloi Ya Hoi

Laa No 58 Roi Rou Laa 1

(Li) Roi Yo Roirouwo Roiromshillo Raatniya

(Dou) Roirom Shillo Raatniya

Kanthui Ruiyo Roirouwo

Laa No 59 Roi Rou Laa 2

(Li) Roiyo Roirouwo

Roirou shillo Raatniya

(Dou) Roirou Shillo Raatniya

Bungmardan Sho Raatniya

Laa No 60 Roi Rou Laa 3

(Li) Roiyo Roirouwo

Roirou Shillo Raatniya

(Dou) Roirou Shillo Raatniya

Thitmar Oisho Raatniya

Laa No 61 Roi Rou Laa 4

(Li) Roiyo Roirouwo

Roirou Shillo Raatniya

(Dou) Roiroushillo Raatniya

Roirou Chingkhamma Khamba

Laa No 62 Roi Rou Laa 5

(Li) Leiromba Leiromba

Kounung Phichom Katshommo

(Dou) Kounung Phichom Katshom Rou

Ringchang Kei Kallo Nanung

Laa No 63 Roi Rou Laa 6

(Li) Roi Yo Roi Rou Wo

Roi Rou Shillo Raatniya

(Dou) Roi Rou Shillo Raatniya

Kanthui Ruiyo Roi Rou Wo

Laa No 64 Roi Rou Laa 7

(Li) Kulkatrhaan Khulkatrhaan

Kulla Tuidai Naniye

(Dou) Kulla Tuidai Naniye

Maring Khuwar Kandanga

Laa No 65 Roi Rou Laa 8

(Li) Ni E Yo Ni Ni Pe

Ramyang Lamsho Lhunga Ko

(Dou) Ni E Yo Ni Ni Pe

Ramyang Lamsho Lhungmakhui

Laa No 66 Roi Rou Laa 9

(Li) Keishong Shangphai

Tuwei Lhoumar Kalkhouwo

(Dou) Tuni Lhoumar Kalmakne

Pawei Lhoumar Kalkhou Ne

Laa No 67 Wameishang Mannei Laa 1

(Li) Khothulrui Wayangyil

Tuni Louman Makniyo

(Dou) Tuni Louman Makniyo

Shanghung Dunnei Kimanneh

Laa No 68 Wameishang Mannei Laa 2

(Li) Tlaini Thokna Wayangyil

Keithol Meirou Yentrum Meh

(Dou) Keithol Meirou Yentrum Meh

Raphal Manchonkimanneh

LHOUTANG LAA

Laa No 69 Nga Shonnei Laa

(Li) Nga Shon Se Nga Shon Se

Ngashang Pishang Ngashon Se

(Dou) Ngashang Pishang Ngashon Se

Tuiyang Khonglo Ngashon Se

Laa No 70 Nga Bunei Laa

(Li) Nga Nise Nga nise

(Dou) Ngashang Pishang Nga Nise

Laa No 71 Nga Shuknei Laa

(Li) Nga Shokse Nga Shokse

Ngashang Pishang Ngashok Se

(Dou) Themrei Waisha Ngashokse

Laa No 72 Nga Lunnei Laa

(Li) Nga Lun Se Nga Lun Se

(Dou) Khiyo Nashang Nga Lun Se

Laa No 73 Nga Maletkhoubi Hungnei Laa

(Li) Thenglatchu Thenglatchu

Thengnga Latchu We

(Dou) Thenga Latchu We

Kakhu Dangwe Sainaniwo

Thenga Latchu We

Laa No 74 Lhoutang Laa 1

(Li) Nongaire Nongaire

Nongai Santa Nongaire

(Dou) Nongai Santa Nongaire

Sanaroiyo He

Lupa Roiyo He

Laa No 75 Lhoutang Laa 2

(Li) Pacha Kumkam Tangna Roi

Khungrui Laa Tat Leh

(Dou) Dicha Leikhi

Pukni Sheilola The

Laa No 76 Lhoutang Laa 3

(Li) Herhilra Herhilra

(Dou) Kengkerhatsa Langaicha Herhilra

Laa No 77 Lhoutang Laa 4

(Li) Oh Leikai Naha Thoklaro

(Dou) Thokti Thoklaro

Sunsen Naorem Khomduna Thoklaro

Laa No 78 An Laaknei Laa

(Li) Kongsaise

(Dou) Incho Inmai

Laa No 79 Meirup Warnei Laa

(Li) Oh Kohai Macha

Nangna Ingkhon Sungbado

Ingkhon Tumhalle

(Dou) Tumdi Tum Halle

Sun Sen Naha Khomduna Wahkengle

HINEI LAA

Laa No 80 Hinei Laa1

(Li) Solung Kongroi

Yeh Ye Ye Moh Lah Rambe Phoining Yong

(Dou) Solung Kongroi

Yeh Ye Ye Moh Lah Rambe Phoining Yong

Laa No 81 Hinei Laa 2

(Li) Solung Kongroi

Teh Eh Eh Mohlah Rambe Phoining Yong

(Dou) Sholung Kongroi

Teh Eh Eh Mohlah Rambe Phoining Yong

YAREKNEI LAA

Laa No 82 Yareknei Laa 1

(Li) He Yoh He Tohri ya

(Dou) He Yoh Tohri Ya

Kara Rasum Meh

He Tohri Ya

Laa No 83 Yareknei Laa 2

(Li) Nama Shikongleima

Nang Khut Lanthokpiyu

Khudop Shibige

(Dou) Asida Lairik Yenge Haiye

Awangna Yeitongnge Haiye

Laa No 84 Khutei Ruilimnei Laa

(Li) Todar Ruilimnei

Yangba Ruilhim Mase

(Dou) Yangba Ruirhon Nase

Sana Ruirhonnase

HANG SHAROI LAA

Laa No 85 Hangsaroi Laa No 1

(Li) Thangsha Iroiya Wo

Kumal Iyang Lamrou

(Dou) Kumal Iyang Lamrou

Chairo Khongchon Nase

Laa No 86 Hangsaroi Laa 2

(Li) Isi Theipok Shangrou

Yangkhong Marlon Nase Hoi E Ya

(Dou) Yangkhong Marlon Nase

Khongpi Yalo Yangkhong Hoi E Ya

Laa No 87 Hangsaroi Laa No 3

(Li) Kongpi Yalo Yangkhong

Khuri Khulkainanung

(Dou) Khuri Khulkainanung

Thraisa Khultrumnanung

Laa No 88 Paar Olnei Laa

(Li) Onshim Paarlhim Shillo

Reilhim Kara Olsho

(Dou) Reilhim Olmuladi

Rathung Halthowase

Laa No 89 Uilourui Laa 1

(Li) Hisi Changbe Lhanglham

Oilou Paoman Lore

(Dou) Uilou Paoman Lore

Oilou Paoman Mange

Laa No 90 Uilourui Laa 2

(Li) Uiloi Paoman Mange

Ratung Halthowase

(Dou) Ratung Halthowase

Maroi Halthowase

Laa No 91 Murshum Laa

(Li) Karlhang Murshum Kar Aal

Rouwa Tuithang Khoiye

(Dou) Rouwa Tuithang Khoiye

Tuithang Khoiye Kar Aal

Laa No 92 Cha Urnei Laa

(Li) Dohlei Yorbi Darkhang

Khuwaranang Yonrei

(Dou) Khuwaranang Yonrei

Yonrei Noukarponbi

Laa No 93 Yinglam Laa No 1

(Li) Roupi Yokoshillo

Koshil Kai Yinglam Sho

(Dou) Koshil Kai Yinglam Sho

Phunglim Yarlim Yingyem

Laa No 94 Yinglam Laa 2

(Li) Phunglim Yarlim Yinglam

Shelpa Manroi Laneh

(Dou) Shelpa Manroi Laneh

Khuri Nelluklane

Laa No 95 Yinglam Laa 3

(Li) Khuyul Yayei Toshil

Toshil Kai Yinglamsho

(Dou) Toshil Kai Yinglamsho

Punshel Ralangbeini

Laa No 96 Yinglam Laa 4

(Li) Punshel Ralangbeini

Ruiphen Choikamlangne

(Dou) Ruiphen Choikamlangne

Shelbung Rangman Roiye

Laa No 97 Rkhang Laa 1

(Li) Khuyul Louwei Yaikhang

Thingna Koura Thingrou

(Dou) Thingna Koura Thingrou

Thinga Nei Angteneh

Laa No 98 Rkhang Laa 2

(Li) Khuyul Yuwai Yaikhang

Thinga Koura Thingrou

(Dou) Thinga Koura Thingrou

Thinga Thingman Noune

Laa No 99 Rkhang Laa 3

(Li) Khuyul Yuwei Yai Khang

Thinga Koura Thingrou

(Dou) Thinga Koura Thing Rou

Thinga Thing Kanteine

Laa No 100 Laam Lhou Khainei Laa

(Li) Tedunran Wo Tedunran Wo

Thingloh Lamloh Tedunran Wo

(Dou) Thingloh Lamloh Tedunran Wo

Thingma Thingkan Sayaowane

RALHOU CHUNNEI LAA

Laa No 101 Ral Mannei Yaa Loulaknei Laa

(Li) Hok Se Hok Se

(Dou) Keirallakpa

Hok Se Hokse

Laa No 102 Nuinei Laa

(Li) Keini Khongkhol Sungkhoule

(Dou) Shoupul Ruini Ralwalir

Laa No 103 Nuinei Laa 2

(Li) Rollo Chihou Re

(Dou) Keirallakpa Chihou Re

Laa No 104 Nuinei Laa 3

(Li) Nongo Chapleine

(Dou) Nongkao Koubiro Chapleine

Laa No 105 Ral Mannei Laam Lou Khainei Laa

(Li) Oh Hoi Le Hoi

Shallam Koklam Phei

(Dou) Shallam Koklam

Nanglou Te Shat

MINPHUKNEI LAA

Laa No 106 Minphuknei Laa Yaonei Laa

(Li) Sheerbi Roka Ye

(Dou) Tapi Leirang Sai Amma

Laa No 107 Cha Bunei Laa 1

(Li) Pilohna Pashanglam Mo

(Dou) Pilohna Nushanglam Mo

Laa No 108 Cha Bunei Laa 2

(Li) Pilohna Lamrel Wayumrei

(Dou) Pilohna Lamrel Sapulrang

Laa No 109 Thirdar Sainei Laa

(Li) Threng Threng Rangai Ye

Woroi Yoteh

(Dou) Manong Sekoi

Daar Lammo

Laa No 110 Nao Urnei Laa

(Li) Rahileh Rasho

Teiwang Rouwe

(Dou) Raheleh Rasho

Shorwang Rouwe

Maring Book No. 2

YENKANRAHN

MAYEPI :-

Parshunga Molung Moshil

Bwungvi Khobahn Khukarthil

Pallel

URTHUTPI :-

Parshunga Molung Moshining,

Bwungvi Khobahn Khukarthil,

Pallel, Manipur - 795135.

Printed Copies : 2000

Sponsored by Tribal Research Institute

Govt. of Manipur, Vide No. 8/3/2009-TRI

2010 Kwum

Printed at : Ideal Printing Press, Moreh Parking, Pallel Bazar.

LWOUKANDANG

Parsunga Samran Kei 1972 kumrou waiyou

Lailik Khoini Keini Manicha Urthut kyoume.

1987 Kum Aabilrou Lailik Tachot Klungkur,

Samran Keiyei Urthut Lailikrap Lhangairame

Tounai Ngamyei Urthut Nimmakme. Nungkhat

Lwainiyei Manipur State Level Tribal Dialects

Book Exhibition Heira Limdeiyei Lwouni Maye

Urthut Lailik Khaang Singthinarou Manimakme.

Maringa Limyei Khoiniri Samran Keini Urthutkur

Lailik Khannitomcha Exhibitionra Youkyao.Keini

Limdeiyei Lailikrapya Muleri Samran Keiyei Mitrei

Mityui Yendakur Muthungmak. Heiniyei Book

Exhibition Heini Keiya Maringa Limyei Khoi

Lailik Maye Urthutna Wakhall Fyouloukurme.

Samran Keinung Dunpuni Lhou Silnapi Hoinakrimni

Lhangai Lhangaimak Thimakni Lailiknung Maye

Yenchasunda Keini Maringa Lwouyei Paolaa

(Newspaper) KANTHOUNA India Govt. Ministry of

Home Affairs Registration R.N.I. Dakra Kwum 1988-1990

Kumchanbilkhe Limya Lungsi Ngamni Nsa-epmakni

Laknakhoume. Heiya Keiyei WakhalTaamnei Hoikurasa,

Maringa Lim thamirap Lakrei keiya malungshipi khoini

Toulhouya Karyompikur Thamiri S. Tongku, S. Angdon

Ch. Leiba, T.C. Mephun, Kh. Moses Keiyei Lhouya Mupi,
Keiya Thoubangpikur Narap Naya Aasinungkhi Samran
Keisolungra Lhim Dabeini Leileime. Heiya Limthami
Deineri Mupimakur Ngamni Keitamni Rikkari Thukloubei
Newspaper, Book Publication 1996 rouri Karngakurme.
Samran Keini thang klei Louhoiyanri limnung lhim
Keiyei Lhoukhaang Heirapso Asinungkhi marngeibei
Heisi loukaleikhe kyame Maringa lim lakrari.
Maringa Limnung Keini Toubamthuk lhou,keinung
Lhoukhruk Beicha Yentounarou Sarungrakhi Kalla,
Lapakhe Kmangtom Hoimakni Limni Lhou Heiso
Maringa Limnung Khoitee Touyei Ngamra Khallpiyei
Wong Samran Keini Mufamakur aangamyei keini
Rikkarai Laanglamra Hoikurme Samran keisolungra.
Heinaksi Lhoura Keiya Rumpikhou Limthami Na
Napung Fangani Karkao Toupimaknung Nai biira
Hannuikhi Samran Keini Buchaleime loubwoupilo.
Heiyaso Lwaipang Thami Kanningle Dunpu Ahyei
Kanning Klailei, Samran Keiyei Rikkrai Wakhallni
Dunpu Ai Kanning Hoimakurasa. 7^th Nov.2009 lwaini
Arou Samran Keiwakhal Dunpu ahni Fyoukanthou-
"Samran, Samran Neilim Maringaya Lungsi Hoimaku ?"
Dunpu ahni Keinung Kngai Keiwakhallra Hungthuk.
Heingamni Lwaini Ayei Nsanung Maye Waikyoubei

17th Nov. 2009 Lwaini Nsa Khinnbil Mayeloubeini Lailik
Khat Khoini "YENKANRA HN" Minfwuk ahya Urthutcha
Lailik ayei Pwumlhouri Maringa Lim Nutar-Patar
Chahnyei Kat-hoikhouya asichahn arou Nuwari, Pawari,
Maringa Khatle Khat Rumkanni, Karbaan hoimaklei.
Bongei Maringa Nutar-Patar wari Lhangaikhe,ashinungri
Naamba Workhou Wong Heingamra Pelnamakur. Heiya
Keini Yenkanserfana arou Kwatsam, Kounhat loukyao,
Duikur-daankur leiyankhi Lungkha Toupimaknung
Samran Keini Hannuykhe Naiyei Kanningra Churthut
Maninung Rumpinung-karyompinung Maringa thamiyei
Biira, Dunpu ahbiira Samran Keini Buchaleime.

Neinung, Ahnung, Yanung :-
Parsunga Molung Moshil,
Khuyaikhu Kholim Bahn

Khukarthil, Pallel,

INDIA KHOKHAHNG

Leipak pichaar urpinung thami, kanre

Khalme khal, kholim thamirapni Meilampu,

Khuthwung khuthwung raalkur pichaar heiri

Urpinung kholim kholimrei Meilampurapni,

Manipur khuchingsang dakra kleime klei.

Kholim kholim khoini constituency, khoi,

Constituency kholim kantangra kleime klei

Meilampu (MLA), Constituency kholim kholimrei

Thamini Meilampu (MLA) khalbang thami,

Constituency rei khalbangkur Meilampurapni,

Manipur khuchingsangraak (Chief Minister)

Lhangairou thamiya khalbang-India Ruiilimdakra.

India, India, India Leipak, urpirou thamiya

Lhangaileiso Dunpu nei kansahmbangpiso,

Lwaipaang dei leipakyakhi duilei nei kansahmpiri.

Pava Dunpu neiyei hutthwul India thangri,

Thinarou pelkannakhi naimak India leipak,

Sakrungni lhangaikuri, Luura thila watmak,

Ngakhwung dhaabi samkep kannay J & K,

Npuiya samfwon twum kannay Goa, samfwon,

India kholeipak lwainithukna heitinbei mai heikalek,

Lwaini dumna tinbei Ahsamfwonya heikumutbei,

Kumutlei, kumutlei lwaipahngra kanchanung

Khuthwung leipakya kanchahni, hutbang heilaamthutri

Hutyaarso Assam, Tripura, Manipur, Arunachal

Meghalaya, Nagaland, Mizoram, hoileime alleime.

Lhangaileiso lhangailei, lwaipang leipahk deirap

kantangni kanthangnalei, India neiyari kanthanglei.

Ngakra kannabi kannsamlei sinayei Delhi thrulya,
Sina Delhi thrullya, nahloukari lhangaileiso.
Thang klei India yehr - yehrkuri India neithangso,
Neihothin, Andaman Nicobar, India kanrilkanna.
O, malungsikanna Maringa kanthang kanrilya
Hoinaleime Maringa Limnutar Limpatar chahnyei
Nawari, puwariya, Nuwari, Pawari hoithunglei.
Angamni Maringa lim lhimri lhangaini kwarlei
Limthamini yrengpimakni kleikarra asichahnrou.
Hoiyanungkhi Limnutar Limpatar nawariso,
India khuleipakni yrengleime, India kholeipakni,
Yrengbi India khuleipakni Maringa limwariya.
Heiya India khuleipakya maryunna langlamni
Silnicha hoinaleime karlo karchaalninawari.
Maringa lim Nutar Patar kanrilna kanthangna wari.

Nutar Patar nawarira marngeikhoume falfei,
Kholim upa Meilampu, Govt. ra rwunghut Meilampume

Khulim Chingsangya thikulpi Chingsangraak.

Kholimyei Meilampurapni khalbahngme
Khuchingsang thikulnung thami lhangaiya,
Chingsang thikulnung thang ur,
Chingsangraak bwom siim.
Maringa Nutar Patarrap wari
Nai yrengkhou laanglamya
Hilthungbi Constituency, khoime.
Constituencyni Kholim hoibeini
Meilampu bwomnakrim, khalme
MLA bwomnung thami khall.
Constituency Constituency rapni
Khalbangkur MLA. Meilampurapni
Khuchingshangya thikulpinanung,
Ruipinung, raakpinung Minister,
Chingsangraak bwom lhakme.
anak wongni Manipur kholimyei
Thamirapni Manipur kholimya
Thikulpinung ruipinung khalme,
Parliament Member Meilampu bwom.
Urpinung, lhangai thamiya khalme,
Khalme, Manipur kholim upa M.P.
State stateyei rwunghut khoini

Kholimyei Meilampurapni khalme.

State Khuchingsangya thikulpinung

Thang lhangai klei thamiya khalme

India khuleipak Prime Minister

(Chingsangraak) bwom lhakbeini,

India khuleipak chingsangraak

Bwom khoini lhou urbeini kleime

Ahyei khucountry thikulbei kleime

Arime ari Maringa Nutar neiwari,

Patar neiwari asiyei lwaipangra.

O, lwaipang Nutar thraime, Patar thraime.

Bongei nutar patar nachahnrouri

Lailik marnokhi hoimak Maringame,

Nutar, patar nai ludokri thraime thrai,

Asiyei chahnnei nayu nacha kari,

Lapa sinaya urthut urthutbeini,

Sangnakrillei lailik heinungeimarno.

Asinungri nayu, nacha, namou

Kaniri mitra lailik yek lhangaini

Katmule nutar nawariya, patar nawariya

Karhaak thuithi hungthuknei ngamni

Lwainisear, kwumsear yenmangleime.

Asinungri Nutar nawari patar nawari,

Mowng kanaiyei lwaipang Maringa lim

Wari mufamakurame asinungri.

Nayu nacharapyei lailik kat-heinei

Limwari wormang daanmang

Touheimakroume touheimakroume

Siempi - shapi Dunpu ahkanningra.

LWAIPAHNG PAVA

Bungvi, Bungvi Maringa khothwung,

Maringa khothwung Upa Bungvi khothwung,

Khothwung Upa, Bungvi kho Lhouva,

Hoikhoutee heiyei chahnyei Lhouva,

Lhouva lakrei Lhouva Parsunga Molung Korung,

Karyoi kantrim Parsunga Samkhu Darleiya Tonai.

Khokanthang, chahnkanthang hoinakhou

Parsunga Korung, Lhouva swomthum kantrimbi,

Chingsaang Yhama loumarkhwulkhou,

Lhouvawo Lhouva Parsunga Korung,

Bungvi khothungya loumarhuykhou,

Parsunga Paaryai Korung, paarbom,

Parsunga Patar Korung, Nutar Tonai,

Lwaipang Dunpu ahutthulso lanbangpi

Parsunga Mothil, Kodun, Angrung,

Me, Leiupa, Leithil, arime hutthulso.

Nyul Te, Tomui, Tungmui, Shangkhu.

Nacha naamyei lakrei nacha Leiupa,

Hoikyarnung malhatpi marnona bii

Sita Primary School Class - I marnokhou

O, Patar Nutar nari lailik marnonei.

Kakanna, lhangaiya yenhoiroume

Touwei wongri loumukhoumak hoineisa,
Pava Class - I marnokhoubi loukarngakurme.
Patar Nutar Yuthwunlamya, lwaipangra
Muluk Hoimakura,Patarro Nutarro asinungri.
Narung khanniyei Hiilam Naiilam heiso
Kansearbikhi kansearluk manimakurame.
Nayu, Nayuthun karlhukni kleina khothwung
Swouramra, Taaoramra, kanchaawura.
Loumarkhulkhou ngamni paarlim heiso
Neicha Parkham Upa Leiupa, rhanglamso
Swouram Taaoram khuthung palthung
Kounhatya yenraalbei Haokhongkhu
Palthungrei Reidang shangkhuya samkhunung
Patar Nutarni Nacha Leiupanung samkhu
Ahya lousilbang Neiyu keiyei Nuvi.
Neiyu Samran Keiya Dunpuni Nuvi, pavanung
Silnapikhur hutthul kumkarwolbong,
Parsunga Molung Leiupa paarkham
Ahni Kho-khoinung fwunbangkur,
Yulfwunna heirou Lhouva khat ahni
Khoini yul (Yaipharok) asi khat dwouni
Ungbeini fwunkurme fwunkurme ahni.
Pavani Swouram Bwungvi palthwung,

Neikhothungya workhoubei khofwuntee.

Yongfwuntee neikhothwung rankhat.

O, Pava neiyei chahnrou thami

Deiri Lailik maye, Paa mani Makurnei,

O, Pava Nangni khothwung heiya

Simbaang sahbaang khoime, pavani.

Kho-Upa khoini katfwunkanthoukur

Pava neiyei kho Khuyaikhu palthungnung,

Pava nangni khothwungnung yenrahnnicha,

Khonung Govt. Office kantangra,

Pavani pelmakur kleikur heinung

Ngamni neicha keiya lwainisear

Ningsunsearni Opibei Opibeini fhaira

Pava nangni neichaya katmaryunpime.

Neicha keiya fhaii Wangkhem Primary

School ra Class - A Waikyoubeini

Class - B marno kwum heirouri,

Pava nangni neikhothwungYaifarok

Khuyaikhura 1960 Kumrouri Pavani

Fwunbangkurme Primary school khat.

Manipur Union Territory Chahnrou,

Malungsipi Development Minister, Seram Angou

Ahya Kum 1961Khuyaikhu palthungra

Yenruiswunda lwainiso lungsinatee yukningthutlan

Neicha keinikhi, Pava neiyei churkhou lhou,

Toukhou lhourapya yukansearnarou kluinaimaklei.

Chahn heiyei Ministerni Khothwung heira hungung,

Minister Champrasi khatni Cycle rei kyenpime.

Lungsinatee keidouyei chahn Wongsu asinungri

Neicha Kei kangak khat hoithungurame Pavawo.

Neicha Keiya fhaiira Class - I hoikhoukyar,

Fwunbangkur School heiya pava ahni kantrannei

Govt. Recognition Kwum 1962 rou toukurme.

Pava Neiya khothwung thami thani pava Neiyei

Klei Thangya thuithi lathikhe heikleikur ngamni,

Fwunkur School heiya Govt. ni sak mukayer.

Pava, Upa khoini Govt. ra neithangya kumutkhou,

Pava Nangri hakarao hoikhounung lhangrou

Pava Nangni Nuvi ahya neicha nranglam khanni,

Nyulla khannile, neiyei Laa Sepok, Thuii - Laa

Sepok Kanaamya lwaipangra workhoupibeini

1963 Kwumwairou raalkur Pava Nangri, lwaipangrouwei.

Keiyari lwaini ningswunsear obeini Class - A rouni

Class - I bill opibeini Fhaiira Lailik marnokyar,

Keiya huni hannuy Lailik marnonung opirou ?

O, Neicha keini kanril kanrilni kleinung, chahnrou

hoithungkur Ocha Khoini neichanung hutthulso.

Pava Neiyei Schoolnung ocha khoini
Lhakkhoupi G. Gourakishor sharmaya.
Neicha Keiyei wongya kumule keiyakhi ahni
Pava Neiyei Schoolra Class - I khoini kwum
Heirou hungmarno neicha keikhi Pava,
Neiyei Schoolra Class - II Kluithungme
Pava Nangni kaya lwaipangra 1963 kwumrou
Workhoupikur kwum yenkarwolbang.
Khothwung thamira khattom, duirou Marthwummak
Neinung Runghut khoini keini Dwouwaya hoibeikhi.
Nuvi ahni neicha Keiya lwoukartam laakartaambei
Kat-hoibeini katringme, neicha Kei-fwulchiso.
Neicha kaya, Nuvi ahyakhe, kai kallaya thibini,
Hakarao hoinakrilkhi, kyao kmaalme, lwaipangra.
Neicha Keiyakhi Khoruii Lhoura Heitangpi kyou
Lailikya marnonung kallame, kallame Nuviri keinung,
Kapuichani kallayei pwutkhrit kat-urso hoyankhi
Heisiyei kallaya urbeini klei-hoiyankhi Nuvi, kei,
Pavani heithi kwulpi, heingmni Class - III rouni
Class - VIII Irilbung Jr. H/S ra palluy deiyei Lailikya
Kwaithothoni katmarnoloukurme keifulchiri.
Class VIII marno kwum Heirou waikyoubi neicha kei
Pava neiya malungam heingamni neicha keinikhi

Khuyaikhu khothungrei Pava neiyei School-ra

Ocha khat khoini School heirou neicha

Keiya Class - I le II marnopikhou ochale 1967 rwouwei
Ocha hoimalnakurme Pava, neicha keikhi.
Pava neicha keiya Deputy Inspector B.C. Roy
Ahni Interview louwurbei 1968 Kwumrou youbei
Pava Neicha Kei Pavayei School-ra Ocha hoikur.
Hoikhoubei neicha keinung Neimou hoinung
Yensilpibeini Neimou Ahnikhe Pava Neiya Marang
Toubeini ahmurni ungnung fakhoumanungkhi
School heirou neimoukhi ocha khoini yensilpi,
Keinung lhang 1974 kwumrou hoikurme neimouni.
O. Pava thanglhimri Khofwunkhou Yaifarok
Khora school fwunpikhou, Neichaya Lailik mukayarkhou,
Fwunkhou schoolra neicha, Neimouya ocha hoikayarkhou,
O, hakaraoroume Pavakhi lhawairari kayaso.
Pava neiyei School heira keinung lhang Ocha
Hunghoitee Pavawo lwaipangrei neimou Ahnikhe,
Pava nangni neicha keiya heisi maryunbaangpi
Heini Ocha hoikhou, thang Road Mohorrer
M.I. Engineer, B.A. Kluibei hunghoitee,1979 kwumrou.
Khayumbui lungnung asiyei Postal Services Employee.
Ariyame, Pava lhawai, lwaipang rahlbongchak khin
Heirou neicha Keinung silnakhoupi hutthul lhame.
Pava asinung neicha keinikhe lwaipang arou
Pava Neirunghut khoini Nei-yuraple Neimou

Khanni lungvile Dunpu ahsefa touchaleime Pava.

YENKANRAHN

Lim Limyei Khoi Khothung Kleime Klei,

Kleime Maringa Limyei Kholim Khothungkhe,

Khothwung Khothwungyei Kho Urna Bwom Kannayme,

Bongei Nutar Patarni Katyoukanna Kholim Bwomri,

Kleime Klei Wong Khannitam Thrailamnung Bwom,

Kholim Manyon Lwaipang Bwom Kleime Kandangni,

Yenkanrahnme Yenkanrahn Bwongei Nutar Patar Wariso,

Sapi Pu Dunpu ahni Bwongei Nutar Patarnung Silkanna,

Nutar Patar Wariri Thraiwarime Lwaipang chahnra.

Maringa youkanna Thraiyei Bwomra, Khulpu (Charanga),

Khullak (Dangsawa), Wairok (Makunga), Dunpu ahnung

Sefaruii Fwunglim Bwomme Maringa Lwaipang Chanhra.

Maringa Fwunglimnung Dunpuyei Yerpikur Bwomme,

Touchok Toukarbaak Dunpu ahbiira Touheimakme.

Fwunglimnung Dunpu ahyerpikur Bwomrap ahya

Urpi Dunpu ahbiira Kya Fwunglimri Tantanga,

Maringa Fwunglim Lakra Dunpu ahni Tantanga

Fwunglimya Thrainung Bwom, Lwaipangnung Bwom

Laanglam Khannira Bwom Ur Dunpu ahsilkhoupi.

Lwaipang Maringa Kholim Simbaangna Bwom Upari

Meilampu Bwomdakra Kholim Simbaang Saabaang,

Chaang Ruii Bwomri Meilampu Bwomyei thyoime,

Meilampu Bwomle Karyom Bwomso Chahng Ruii,
Sekruii, Kholim Thraiwari Urpirou Fwunglimri,
Charanga Fwung, Dangsawa Fwung, Makunga Fwung,
Bongei Wari Hilthungni Fwunglim Khayumtam
Aya Thainai (Thrainai) Toubeini Loumukanname.
Kholim Lhangainung Tangbaangnung Lhou Meilampu.
Khothung Wairei Lwouthuk Laathuknei Pichaar
Khoyama Kartukbei Pichaar Pwu Khoini luirouri
Meilampuyei Murrlwouni Kartukna Pichaar Kluime.
Kholim Kholimrei Kho Upa Meilampurapni,
Khochingsaang Upale Kalhonni Pichaar Churbaang,
Khuchingsang Upa Chingsangraakpa Murrlwouni Kluime.
Kholim Kholimrei Meilampu Yamari Khulpu, Khullak,
Wairok, Chaangruii, Lwou Kyun Khei Thamirapme.
Khothwung Khothwungrei Bwom Ur Thamirapni khalme
Chingsangraak Bwomnung Thami Loukhalme,
Manipur Khulim Leipakrei Maringa Limkhurapyei
Kleina Wongyei Hilthungni Maringa Limyei khoi
Chingsangraakpa Khayumtam Bwongei Loukleitee,
Swouram Chingsangraakpa, Rillram Chingsaangraakpa,
Taoram Chingsangraakpa asi Toubeini Yenkanrahntee.
Maringa Kholimra Bwomrap Heiya Urpirou Thamiri

Kho Heiyei Thrailhouya Churpirou Thami Heiri,

Bwom Heiyei Fwunglim Thamini heisi Hoirou.

Khosimbaang, Khopichaar, Chingsang Pichaar

Urpirou thami Heiri Khothungyei Meilampurapme.

Heirouwei Khoyamarapni Yhakril Thamiya Khallme,

Meilampu Bwomnung Thamiri Fwunglimra Kartinmak,

Chingsangraak Bwomnung Thamikhi Fwunglimra Kartinmak,

Khulim Khulimrei Yamarapyei Kya Thamiya Khallme.

Chingsangraak Bwomnung Thami Meilampurapni khalme,

Meilampu Bwomnung Kholim Bomputrei Thamini, khalme.

O, Wari ari Bongei Nutar Pataryei warime, younahme,

Bongei Louklei Maringa Lim awarime, Thraiwarime.

Yenkanchailei Yenkanchailei Maringa Lim Kholimbahn,

Kholim Kholimrei Yenkyoubei Yenkanrahnlei khobahnso.

Maringa Kholimbahn Khoran Maringa Limra kleime,

Maringa Kholim Kholimrei Kho Khoini Rhan Rhanri,

Katfwunleime Katfwunlei Dong Khamri Naimaklei

Bongei Khobahnrap, asiyei Khodwourap yenrahnri

Limpu, Limnutar, Limpatarrapni Hakarao Hoiroume.

Bongei Limnutar Limpatarya Lim yucharapni lhangaini

Kansearkanna Hoithungnung Limwari Kleitee.

Limwariya Karhaakri, Thuithiri, Limnutar Limpatarya

Karhaakkurame, Thuithikurame, Workurrame.

Nutar Patarya Thuithikurri Maringa Aalimya Thuithime.

Khobahl Bwungviyei, Yenkanrahnnei yenhoikurri

Bwungvi Khobahn n Kangoi, Waithou, Lheivi, Langmeiching

Kharou, Anfoubwung, Yaipharok, Phunchong, Laipham, Loikong,

Sarei, Hongkong arime Kangoi Khobahn n Kampaang,

Kwarok, Kangoi Yuldwou, Sammanfai, Thacha kanchai

Yaipharok Bwungvi Khobahn, Waithou Kholimbahnso n

Waithou Yuldwou, Moirangkhom, Thacha Yaipharok ariya.

Lheivi Kholimbahn n Satang, Langkhongching.

Kharou Kholimbahn Rilram Centre ariyame.

Anfoubwung Kholimbahn Khuninglung ariyame.

Bwungvi Kholimbahn Yaipharok Khokanchaime.

Phunchong Kholimbahn Chingjaroi. Sarei Khokanchai,

Hongkong Khofwuntier, Maring Kholim Kholim Lakra

Yulvi Kholim Khobahn n Tuinem, Tuishan, ariyame.

Dudu Kholimbahn n Langol, Christian Compound, Laampi.

Laampi Kholimbahn n Choktong, Fwungthil, wakshu.

Langol Kholimbahn Langol Yuldwou. Krungthil Khobahn n

Laiching, Koichom, Wapaching, Thamlai, Heinoukhong.

Laiching Kholimbahn S. Phunal, Kangshang, Meipou.

Minou Kholimbahn Koichom yenrahnsunda limkho.

Narum Kholimbahn n Island, Beaulahram, ariyame.

Saibol, Khulimol Kholimbahn n Teraphai, Maringfai.

Uipu Kholimbahn n Yamolching, Biyang, Maringlane,

Khangsim, Nungourok. Marimchi n Kharou Yuldwou,

Kamu, Parengtong. Maringa Khokanthrai n Tuisimi, Lheivi,

Kharou, Marimchi, Krungthil, Saibol.

Khukarthil n Waithou, Yaifarok, Lheivi, Langmeiching,

Krungthil, Bwungvi, Phunchong, Kharou, Laampi,
Satang, Dudu, Moirangkom, Kampang ariyame.
Taoram, Swouram, Rilram kholim kanthray khwo.
Maringfai nSaibol, Khulimol, Laampi, Kampang,
Koichom, Narum, Khulimol, S. Phunal, Tuinem, Langol.
Loumartumme Lim Limnung Lha, Maringayei khwolimso.
Baalkardhou, Yaalkardhou, Karsang, Dahnsang,
Hoi Maninung Maringa Limswu Khoini n Swon,
Swontang, Cheiipak, Khanglang, Chwung, Mallaa.
Thami Chiebalim Lwaipangra Riing Kyanung, yreng
Kum Kumnung Khoi Lhalim lhana Biisim Loumaa.
Lhana Biisim Kyanung, Louhintang, Louhinkhup,
Louhinswun, Ywuna, Tukna, Liengna, Khorrna,
Kumchaan Yenkalungle Markumna Lhahngkuy, Fok,
Chamchii, Chwung Sangfai, Luthungluk, Bwungka.
Nungsa, Nungkro Kalla Khrilna, Dokna Karleena,
Fwokfai, Karsill, Limthang Hoikannatee Lhouchur.
Nungsa, Nungkroo Karngamak Thami Maringa.
O, Bongei Khothung Thamirapni Louhoikhoutee,
Lamswo Lambaan Kantangra Hochwunyei Hochwun Thrall.
Louhoitee Lhouchur Kalla Mathrilna Tuulkhang,
Tuulbwon, Tuulkap, Khowr, Laangbhn, Harwul.
Kumkhatnung Yenchurkur, Kallakur Lha Kumuna

Hakarao Nungkangai Hoina Kummoi,

Hoikum Wairei Bii Biira Kallana Biira,
Lhalhaak, Twuklhakkhou Lhaalim,Heilim,
Yenmarkumna Hakarao, Nungkangaina Kummoi.
Kumyei Lhalimya Yenmarkum Kluile, hannui
Kholim Kholimrei Nangahka, Karlangani,
Khuthung Raalbeini Kumtin Kyanung,Rakhaangra
Lwoukartaam Laakartaamnung kartinme.
Kholim Nangahkarapni Dei khothungra,
Kholim Karlangrapni Khothung Deira Kumtinkril,
Hung Khulim Nangahkaya Louklei Khothung
Karlangarapni, Kumtinseini Loukaropi.
Aritee arite Bongei Maringa Limyei youkannaso.
Nangahka, Karlang Kuykril Lungsikrilna lahnglam
Khinnri Kum Kumyei Hannuy Hannuytomnime,
Maringa Lim Nuvi Pavarapyei Kyapi Khinnme.
Bongei Maringa Nangahka Karlang Lungsikrilri
Kumtin lwaini Heirou Seiilamni Lungsiya shaalthut,
Lok Omna Heibiira Kandangthutkrilme lungsiso,
Lamkrini Seilamni Fwungyal kangaibeini,
Kangaikril Thangrou ahminlam Kangai kandangme,
Thangrou Puiri Pari Wari Nangahka fwunglim
Karlangani Kanre Kandang Kluile, Lungsiyei

Wari Parmal Khoini Kyoume Maringa Youkannari.

Thingtang rotang saatna, siimna, thinglaangsee

Chingsahng Chaakkhaang lhoutang thuk,

Chaak ngaan, Anthung hoinanung kholim

Bomput thamini lwainikhat thinglaangsee.

Yrengme yrengme Reii, Swontang bomputrei,

Maringa bommai chimmai kantangra yrengme,

Yrengme lukrangsangfai, chaakkhahng lhouthuknara.

Chaswu, chaaklhaak, chaakngaan thokna.

Kum kumnung lhalim lhaakar chahn hungdale,

Yenmarkumme Napuiyani lura thungbi urnaluk,

Luthungluk, Nipawani pwutlim urna pwutpaang,

Labaangra chwung Chwungsangfai, Lwoubungka.

Loura lhalhaakkur lhalimya marhuibahng kyanung

Lwouthutna bungka Lwoubungka yrengme yreng.

Kumnung yenmarkum naamba yenkhouna Pwong.

Kholim raalbei rochayai, kummoira baangnung

Marthing marthingyei firull khouna, marsikna

Rahuy, meikhwu changmakna Thwull, Lukkhum.

Khoime Khoi, Nutar Patar Almirahso, Maringayei

Bongnung Patar Nutarapyei firull marthing

Khouna Almirahri Taangmai Lukkhum, Thullkhum.

Maringa limyeiri chimyei waira kleime, yrengme.

Yrengnung bii bii, Bwomlill epnakok, Bwomthwo,

Ranglam pipa epnakok, bomlill npuiya, npawa

omna bii, Omnachuy shak kannai.bongei

louhikur bommai thami tarra tarruy yayei
lhouwainung Twull tipsundana chopcho, Ywumfu.
Bwomlill Bwomka, bwommai kra Seikhouna
Seifwu, tarkung biira down, chakamai thungna,
mwongnungYui (Tuidown) khouna downna bii.
Khullram thami klung, leikai kuy thami polhak
Thami wha-omna bii, mei whalumna raobom.
Fwunglim klai upa wha-omna Pongsahng,
Fwunglim karchun thami upa wha-omna Lhailouu.
Whapolhak thaminung Twullokthong loukhahngpi,
Arime bongei nutar patar youkanna marchataso.
Napuiya sill, npawa sill, npuiya sillra yrengme
yayekna yahingroh, Pwotbungka, Mhuybungka,
Mhuythil, Pwotkaapna, Pwottaangna, Pwutyuun luk,
Yakhaangsilluk. Tuisorei yui yhukalouna fu yuipull.
Chaakfwu, Annfwu, Seiluk, Meruk,Chak-ann
Khotchokna truung, annleii, khhallna,khupna,
Kaiikam, chamainung lhakna chaakpaang,
Annkaiikam, khaangbangna chaangdhou, pwutchei
Meitrang thakra loutoutaarna chaangdhou.
Pwutchei khaangbangna traktrul, chaangpik.
Annaam khouna Annluk, Twulkhang hoina fwu,

Fworkhangyu Lingliing dwoura,dwonbaang

Khang, fwormakni lingliingra dwon, tuikhang

Npawani yui papot urna Yuibungka, pwutpu.
Chimwaira omna Omnachui, Omnatum.
kleime klei Maringa lim bwommai kantangra.
Twulbown, khorr, laangva, harull, hutchikkok,
hut-ho toumarthingna thingkowng, thinglhing,ngaan,
ngaanyill, warofwu, meichapna, chaakfwu annfwu,
chapna ngakchapna, natsa karngana Epna khumdwou,
Homaibha khaana hokhaang, filam, luukhaang.
Meira toutaarnung riingna riingchei, Annswuk,
Nungsara taarnung founa Wangkhwu, seii puum owlna,
hwomna leikhwu, tharsha chapna chaiichi, meiyap pwung.
Ronichanang Swon urna Swongfai, hallkanwai lhirna
Khwuntring, loura waalim, yaalim touchii touthuunna
Bworull, tengkuung. Fwoksaang, Fwoktoy, Yuisworna
Haarull khouna haarullbwungka, Twulchum dwongna
Kok, twulmongna twulkap, darkok, yrengme.
Maringa bommai kantangra sill aa lwukni kleikrilme.
Maringa limra lhouthuk wong khayum kleime :-
Nallnai lhouthuk, kholim lhouthuk, Chingsahng lhouthuk.
Chimran changna kummoi :- khonloy, Uiring, Royrou.
Charanglam, Nu klou kummoi Twulswor, Twulkham.
Kleikhou minlam dhoura lhakbang kummoi Minfwuk,

Kwum chaapaar lhangai markumna Kummoi Chaa um.

Polthung, lhamun fwunkur kholim chaa um kummoi

Fallfei Chaa um, Arime Maringa youkanna wongri.
Kanrelei, kandanglei chamin falfeiri Pipa, Naola,
Karbeelei, karbaanlei cha runghutni Pamo, Pako,
Paangte, Pamee, Patull, Nutee, Nutoo, Nupee, Nukhuu,
Kleime, khukra karbaana, lillra karbanna ungnalam,
Patar, Nutar, Patang, Nutang, lillya kansearnungme.
Touheimakme, kansearnung aaya toukaanri,
Dunpu ahni Maringa limnung laanbahngpi hutthwulme,
Kansearnung hutthwull waira lhangai lhangaimakso.
Kansearnungme mollim karsaangya hoibeinikhi,
mollim, daamlim min, thalungtang, thingtang rotang.
Kanrenungme kanrenung khothwung khothwungyei khoini,
Karhaakya hoimaknung, kanrilya hoimaknung khothwungni,
Maringa Innu ram fwunkanre laakanre hoinungei,
Fwunkandang laakandang hoiyarrase Maringa Innu,
Bongei patarlill, Nutarlillni louwarikhou Puwari Pawarime.
O, bongei Puwari Pawari lwoubaalme lwaipahngra,
O, louhoikhoume thami kleinung simna biiya ywul,
Ywul heirou chimsing kanchailanung powlthung kannay.
Hoime powl heiri ywul heiyei khallura,khattera,
Yenkar-anme ywul heiso khothwung hoinanung.
Kleina ywull khothwung fwunnung wai laanglamri hoime,

Powlthung, Lhamaal fwunkur ywul heiri "Kho" hoirame.

Kho fwunkanrekur Khowari, Limwari yreng kyoume,

Kansearme khowaira kantik, karbaak, chehr.
Hoirame kho heiri Dunpu ahyei kanning dakra,
Touheimakri, kho heirou yamakkurri Dunpuni yamakme,
Kangeime khowari lhou marthingra, karbaak thamiya,
Touheimakme touheimak kho lhoura karbaak thamiri.
Karbaakkur thamini, kho lhoura kyao yamakme yamak.
Kho lhoura karyom, karbahn touheimakme touheimak.
Limwari, khowari kleime Maringa Fwunglim-daanlimso,
Maringa Nutar, Patar murrwari Yenkyou, Katkyou.
Maringa lim Fwunglim fallitamni swonkanthoume,
lwoukartahm laakartahmbeini yenkyou Maringa.
Lwoukartahm hilthungni yenkyouna Wangwaira,
Katswonkanthoume lwaipangra Maringa limri.
Yenswonkhouna Wangwairei katyoume Maringa.
Fwunglim toukarbaakso, Fwunglimni karhaakkrill,
Fwunglimya karbaaknei Fwunglim heiyei bahnso,
kleime klei kanre kandangni Maringa limwariso.
Heiyaso chahn heiyei kyunkhei yaikheirapni,
kyunkhoupime Maring limwariso, puwariso.
Heisiya hoibeinikhi Fwung hiinairi holkhramak
Nwu klou, saldwun Fwunglimni Fwunglimya "Piingla".
Ngamri npuiya, npawa fwunglim khatdikme,

Kansearlei lhouthuk kantangra Fwunglimya,

Fwunglimni Fwunglimhii loukril sahkrill "Piinglam"

"Karbaak" fhakurame chahnni kembonglimnung.
Kansearme Thrai lhourakhi, lwaipang lhourakhi,
yamakme karyomnung, karbahnnung kho lhoura
yrengmakme yrengmak khothwung lhourari,
Kantikname karbaak hoikur thami ahyari.
Karbaakkur thamini kho-upa, urna kho, heiri,
hoirame Karbaak kho, limwari hilthungniri.
Kansearme bwongei Nutar, Patar, Thraiwariso.
Karbaakkur thamini kantikya kannaymakni
khobwom, limbwom urri tangbaang, hoimaroume.
Lwaipahngra lim lim kanrenung Dunpuni silpime.
Lim kanrenung Dunpuni pipikhou lim limyei lwou,
Lim, limyei lwou marhuybaang, maryonbaang,
heiya, koura kansearlei khinnsear lwainisear?
Kansearlei Dunpiniri Maringa Limyei laanglamkhe,
Heiyaso thami limri rungmachalra, kanreni kleime.
Waalim Aakni Waalim Arhong, wongya kansha,
Chimhokswunni Ramhok puiyei hilthungmakme,
yukkansearroume Dunpuniri thamilimya lhangaini
pukpi chiebalim kansearnung, yukpukpi ahpuime,
Thikulpime thikulpi ahyari pukpi pui ahniri.
Ahyei cha, ahyei pui, kannaynakrim lim limyei

kleime lim limyei khoi lwou kanre kandangni.

Nutar Patar chahnrouri khothwung khatrei Nangahkani
khothwung khatrei karlangaya, kumtiinsei,
khothwung kounhatya raalbeini sangnakrilltee.
Heinaksi kumtin heirou lungsikril kyaori seikhoini
malungya marnimkril, lungsinatee heiyei chahnso.
Yakhoumakme palluy yaomakni karlangale rownichaso.
Lwoukarbaan lhangaitee bongei chahnyei thamiso,
Lourengkhoutee taanti Rakhaang upani, kraal thamiya
Taanti kleime Rakhaangya toumandurnei, taanti.
Rakhaangya workhoubei pichaar chaswunda kantikme.
Bwongei chahnyei Rakhaang thangso, lhangaitee.
Bwongei chahnyei youkanna Upathang Sekruythang,
Bwongnungri Dwouwani Upaya, rikkaraiyei fwulchini,
Upanikhe Dwouwanikhi, uklum karyom khoini,
Lhawainung Dunpu, lwaipangnung Nuvi-Pava,
Lhawainungkhe, lwaipangkhe Dunpu ahdahkra,
Nuvi, Pavayei dahkra fwulchi chahnya kembonglim.
Dong kannaymak thamiyei fwulchi kembonglimri,
Kansearme, Kansear Dunpuni, Nuvi, Pavani
Fwulchi chahnya kan-aan naimakni lwaipangra.
Thikulpime, thikulpi lwaipang chahnnung

.........................................................................................................................

TAORAM PALLUY

Mollim karsaangyei swonkur taoram keipalluy,

Malungsikannatee taoramrei keipalluy, reidaangso.

Chingsang pwolthung kounhat kounhatya raalbei

Swonkur keiyei malungsikanna palluyso,

Karsaanguratee lwaini, kwum kounhatya yenralkurso.

Yoo paolaakhi mayekmakura kourei swonkuraso ?

Asinungri keikhi yenhoirame nangahka touso,

Louhoiyaroume ahkhi nangahkawo, npuinuwo ?

Malungsinatee bangei taoram Keiyei palluyso,

Kwum-chahn asi yenkarsangkurkhe ah-keiri,

Famakuratee paolaakhe keipalluy Taoram biirei,

Palluy ahsolungra keiya yhoukha hoiyuraku ?

Nimmanung mollim deira ahyei karchunakur

Lhouyahng khatyei khokalhon louhoikur ngamku,

Karkaopiwurasa swouram ahpalluy keiyari?

Lwaipangutou arouri dwouchayei katyoumalkanna

Malungsikanna palluyrap lwaipang thami hoiyabeini

Kat-hoime kattang katchoubei nangahkaso.

Oh, kai nuvi-pavayei fwungya workhoubeini,

Hunghoiroume fwunglim deiyei mwou khoini,

Fwunglim heiriyo falitam kleinarouwei, khatra,

Nuvi-pava fwunglimya workhoubei fwunglim

Khyumyei lakrei fwunglim, karyui kanchang
Khatyei mwou hoinay minlam hungfaroume.
Maringa Nuvi-pavayei fwunglimle kalhonni
Makung, Tantang, Charang Dangsa,
Louhoirasa fwunglim aayei lakrei mwou
Taoram keipalluyso, kouya hoikurasa ?
Nimmanung hoiyurasame ahlim-keilim Maringa
Workhoubeini limdeiyei mwou hoikuraku ?
Lungsinatee keiyei taoramyei keipalluyso,
Hoikurako ahsolungra kanyhoukur ?
Nimmanung Nuvi-Pavayei fwunglim karhaak
Lwoukantik laakantik hoiyunarou rikkarainei
Pwutkhrit urbeini kleikurku palluy ahya ?
Oh, ahkhi loumuroutee keini kanrilso.
Maringa fwunglimya lhangaini kumu palluyme,
Kyunpime keinungkhi keipalluyni, yoo nang-keikhi
Nungkhatnuiri fwunglim deiyei mwou hunghoiroume.
Palluy nangni keifwungyei mwou, keini palluyyei
Fwunglim mwou hungwoileri nangnikhe keiya mwou,
Keinikhe neiya mwou hungungroutee lungsinaleiso.
Manneicha (Palluy) ungkrilso mwou ungkrilna chahn
Kou, kouya hoiyanungkhi keikanril aniri hoimarousa,
Mollimni karsaangbeikhi karsaang manthamakni,

Kanloyrouwa hakaraole kalhonni lwoukarbahnnung.

Lakarbahnnung khinn silrouwame lwaini katwarleri,

Lwaini katwarna aarpao, koutounei tammakawu ?

Aarpao neiya, karngeikurame swouram daangvi keiri.

Aarpao khyumbui neiya karngeinarou swouram

Daangvi kei kannrilnung laanglamkhi makurame.

Shola tuishir manchirbei kei karngeiso Aarpaoya,

Aarpao kattamla, kanloyrouwa Taoram palluy khora.

Khopolthwung kounhat, mollim karsaangya hoibeikhi,

Kanloylei kallani karyui, karyuini hungkurso taoramra.

Hunglungame palluyyei khopolthwung khatteera.

Kei kallaso mathrilrouwa taoram palluyle hakaroni,

Mollim karsangrei hungnei kallaso mathrilrouwame.

Polthwung polhakbei palluy mairungya thirouwei

Hakaraoni palluy chimmaisutra hungpao, karwol,

Karwol hungpao, kho heirouwei ahpalluy nangahka

Khatni ahya loukrobeini - oh, nangya huwo koukhurei?

Keipalluy Tedar palluyku ? Ou kei dwouyei youbei

katmarekmalna ahpalluy Todar me keiri manneicha.

Oh, palluy, Tedar palluykhe keiyeikhi palluyme,

Palluy soo kachimra hungkarngawasi. Kallawaroume.

Asitoubeini palluy khatya rokrillnung hungnarou,

Hoirame palluy khat, hannuy hungfatholeime,

Todar ahsoolungra hakaraole lungsile, kalhonni

Todar ahmitrei mityuii twum twumyei yendakurme.

Yenkungswundakur, Todar muthungmakme.

Todar, Palluy hungfanei ahmityui tuiisir
Yendakur mwuni mwuni katrutkur munarou
Palluy, palluy aara chimwayrei keiyei kleina
Kokra karngawasi hungchangpiyalo, palluy,
Palluy neiyei pwutchei keini khouweisi,
Palluyri Mollim, khothwung karsangni
Yenkraalnarou kalla thrammaroume
Nei, firul aani yukmallhangpilo, aase.
Karngabei kou kou warikhe karbaanrillasi,
Todar, aangtuyei palluyni keiya loukropi wongri,
Keiyei, fwulchi chahnrou kangakle, hakarao
Khwunni :- palluy nang keiyari toupong kanniku ?
Lwou kyunlam hungom, aangtuyei lwaini
Palluy ahni kllaoni :- nimmakme Palluyyo,
palluyni palluyya, toubam thuknei toume keiri.
Heiso, keiyeikhi palluy neiyeikhi palluy Tedarme,
Ahriso khothwung kounhat kounhatya raalwubeini
Fwungbaal mumakna deiliimyei mwou hoiyurame.
Ayaa, palluy hoibeini keinungri paolaari pimakni.
Nimmakme palluy, ahso khothwung arouwei
Fwunglim mallkanna karlanga khatle lungsikrilnei
Ahyei Nuvi-pavani karlanga heileri klei yamakrou

fwunglim-yaallim khatdikme, piinglamme toubi

asi kyunpi heingamni kwatsam naimakna limdei

Karlanganung salldunkur kwum yenkarwollurame.
Heiso ahyei Nuvi-pavani ahya karhaakso
dhammakhuime palluy, asinungkhi nuvi pavari.
Swouram palluy, malung kanrilso, khammakhuyme.
Reidaang chahnri, lwaini chipmak parlimnakrimme,
Marhuirim marhuikuratee Swouram palluyri hoikur.
Krulei, kruleime reidaang fwulchiri chahnri,
Nuvi-pavani nyulla chaya manyunbangnai kallakur,
nungkro-nungsa dhouvi kanthramkursoo,
Hutra-hora hiidani kanchekkur, fulchiso
Ariku Nuvi-Pavayei nwumanri kallamanri?
Yaya workhoubei Nuvi-Pavayei fulchiya,
Solung youkhayarbei klao-klaoni workur,
Fwunglimkhe mumak deilimthami holkur heiriyaku
Keiyei palluy Taoram Daangvi, Tedar,nangri ?
Palluy, kapalluy Tedar ahyei Nuvi-pavaya
Lwoukarbaan lakarbaan hoinung pwolakasi.
Putang-pitang; kamanneicha ahpalluy hungleime,
Aaya ara hungomma, Tungcha neipalluy ahminri ?
Nuvi-pava keiminri Todar-ungme Swouramreime.
Tedar palluy, Todar, Tungdar malungamnaleime.
Malungsikanna hoikur nai nuvi-pava kasiri

Asi hoiyurame, Tungdar soo nasini borthing martumlak.

Martumbei lok charou, wari karbaanri borthing

Kloukur hilrou karbaannasi, kartammasi.
O, Dunpuwo kangakme kangak, Todar ukra,
Keini mollim karsaang, khothwung lhai lhai
Kounhatya yenralbei hungnei kallakurso,
Marnimpiwurla pava Dunpuwo kei pellarame.
Tocha Tungcha nai palluy ahri ahya katyuktangnei
Nayei Nuvi-pava kai kallakurso nungkhatnuikhi
Kalla mathrilnung chimpal-loupalkhe hoimakurame,
Tocha, Tungcha narungkhanniri - nai malungshi
Nuvi-pavayei kallaman, Nwuman laltulso
Fwungdei minlam klounii lwainirou nungkhatnuiyei
Khoiniyankhe nuvi-pava yai palluy maibongra
Dunpu ahyei minlam dakra chimpal hoihung,
Dunpuni Fwor nanung pipi hoiniyasu.
Tocha, Tungcha narung khanni

..................................................................................................................

CHWUNG SANGFAY

Dunpuni lwaipangra silkhoupiri pwu karpangtee,

Pwukarpang lahkarpang lwaipang chahntee,

Lwaipangra pwukarpang, lahkarpang hoimakri

down lungmak lwaipangme, chahnme asiyei.

Puii-paa, marthing-mandur, kharing-khii, kannaime.

Lhangai-lhangaimak, kammeh-kwar, saa-kreii,

Dhwun-kanring, kalla-nungkangai, kanrill-hakarao,

Kamubam thukme lwaipang thami kantangri.

Kousiya hoikyar Maringa limnung chwung sangfay,

Lwaipang thamilim deinungri lha aya silpimakni,

Maringa limnungtom silkhoupi ari, sangfay puu,

Maringa limnungtom silkhoupiku Dunpuwo puuya ?

Kleiroume Dunpu ai kanning khatri Maringa limra,

Chwungsangfay, pwutcheiya urnakrillme puukarpang,

Pwutkhat khoini urna kyanung pwutpu kannay.

Sangfay khinniyei puu khoiri pwutpu ariyame,

Sangfay khannirei wongya pwutpuni kamman,

Lwaipang thamiyei fwulchiri kwolme Dunpu ahni,

Khanniyei wong khatsi hoimanungri urkhrahmakme,

Chwungsangfay hoinung yamak anakrim : hoimanung,

Thaminikhe npuiya-npawa malkanna uk hoinung.

Hoimak bommairi karhaakril bommai hoime, shangram,

Thamilimri Nushall, shangram, fulchi karume,

Ukning karbankril, karyomkril, uklumkril, kartamkril,

Kandangkril asi hoina biira hoime malungsikril.

Nungkangaiyei, bommai-chimmai, khothwung, chingsang,

Tangbaang-choubaang khoime Dunpuyei wailamra.

Lhimni kumut, thami khattomni limya tangnanung,

Kansoori, kanchek khramakme lwaipangra hoiri.

Chwungsangfai khannira wong khatnaksi hoiyanri,

Hoikurya chwung puu hoikhrame, khatsirame,

Aanaksime aanaksi chimmai, bommai, khothwung,

Chingsang, lim simbaangri khatsi uk hoinungme.

Hoileri chimmai, bommai, Chingsang, kholim, heiso

Tangbaangkyar kllaime-kllai, lwaipang chahnra.

Thami chieba hoiyunei laltull marthingura laltulso.

Lwaipang chieba hoinai laltullri lwaipangya raalkurle

Laltull singnanung khinn markkurame, rahllura.

Limthamini ahyei limya maryunbang lhoume lhimme,

Thikarilme, limkhatni limkhatyei wongya hoiso,

Uklumkrilme lim limyei wongyei hilthungni lhimso,

Kanthangnarilme limyei kleithang hilthungni lhaso,

Lwaipang tharmori aiai kanningra kleime klei,

Limri ai ai kanningni hoinung yamakme, limri limme.

Tharmoya holbeikhi ahyei limri holl krume holkhramak.

Holkalhon hoiyarnung yamakme tharmole limri,

Tharmoni limya marhuybaang, maryunbang, kya

Tharmori baal kannayrou aikanning hoinung,
Limri aikanningra thwungkhramak, chwut yamak,
Heingamni, limlhaari worthi-daanthini, hoikur
Kleina limri kansotme tangbang choubangra.
Heisinaksi limwongri hoime bwonbayle khatnaksi,
Yuii lhakna bwon, lhakkramakna bwonhoiara.
Yrengnung yamak bwonri lhou hoinamak bwonme.
Thamini ahlimya thikulmak, kansearmak, hoikur
Thami ahri, baykur bwonyei wongle malkanna,
kansear hoimakri siemleiya markhol khoini
Klouroume, klourou sapu Dunpu ahniri limthami.
Dunpuyei kanning lwaipangra markhee hoinanung
Kharit-khayang thina wolna Chwung Sangfay.
Maringa chwungsangfay wongnakrimni
Thirou Dunpu ahni lwaipangra

...................................................................................................................................

KOUSI HOIROU

Kallalei kallaleime, Dunpuwo lwaipang aa,

Uksalei uksaleime, kouya hunghoirou, lwaipangso.

Mumanmaklei hilleinung, lwaipang ahyei wongni,

Dunpuni lwaipangya kringpina poll heiso, kumutpi.

Pava Dunpu nei khaakur pollri kounatyei karbillkur.

Heiya pava Dunpu, Maringa paaryao yekkwulya,

Lhangaini karbillni, khapimakuraku yekkwul pollya ?

Maringa Paaryekkwul pollri paaryaorapni kumuri,

Poll khaaleime touyei yai wakhalra ningmumaklei.

Aaya mupimakuraku, thipimakuraku pava Dunpuwo ?

Lwaipang paaryao deile Maringa paaryaoleri,

Karlhikleime karlhiklei pava Dunpuwo, Maringanungri.

Maringa Paar yekkwull paarlimya kounaksi paarlimmu?

Maringa yekkwulrei pahrbeini kanhainicha paarlimso,

Paarbomri thinarou pelkannayei hoimakurame hoimakura,

Paarbomrari thinarou kallakkanna paarbomri hoilei,

Lhangaileiso thinarou pelkannay paarbom, hoinakrimlei,

Paaryao heiya Dunpu ahni paar heiya thilera Ahsolung,

sakri lhangailei, paar ahyuira whasim lwaipang

Khwuilim-waalim kanso, lungkhani kallengkurnakrim,

Koutounei asi hoikuro pava Dunpuwo Maringa limri ?

Kounaksiyei hoikurrasa, paarbomra thilan paarlim.

Naara thilan thingnaa, trungra thilan khwaatrung,

Dunpuwo, Maringa paaryaorei kleiri paarlim khome.
Thinglimku hoimak, khwaalimku hoimak paarlim,
Kounak paarlimya Maringa yekkwulra hoikyarpiwu ?
Lim kanre, lakanre hoimakurame Maringa lim wongso.
Lim kanre hoimakur, Maringa paaryaoso, kousi hoiroulei ?
Hoiyurouwaku asiyei lwaipang chahn arouwa Maringa,
Pava Dunpuwo toukanre toukandang hoipilo, lim aaya,
Thinglimmu, waalimmu, yaalimmu, paarlimmu, kanre kandang,
Lim limyei lwou kleime lim klai-klaini laipahngra.
Koura ahyei ahyei chiemya workhoubeini, lim thamini
Kansalei deiyei chiemya ahyei chiemnakrim hoini.
Mumakura, mumakurame rikkaraiso asiyei chahnrou,
Chiempwuni nungkhatnuiri swuimakni yenthrammeiroume.
O, khinn heirouri yenkansearfaroutee Maringakhi, nungkhatnui.
Lungsikannatee chiem heiri fanung manimaroutee, kallengni.
Kallame kalla mangkurya rapfari, kalla uk thrammakme.
Fabeikhe hoimaroutee tanghakkei wongso, hannuy klengni.
Hunung kansoopirou, hunung hungtaynarou, thukkur wongri.
O, heiyei khinn heirouri deiniri laokanna hoiroume,limyei wongya.
Kouyari touweirou keini touchaso keini hungfa, heiso chhimme.
Ai touchani ahni hungfa, Dunpu ahyei picharrme, lhawai kantangra.
Karung marthumni kleikur leipakri raalbiime, hoibamme.

Maringa paaryao yekkwulri karungtwomya hoiyurchiya.

Kat-hoikur ngamni karungrapyei kleinung bii, koura hoirou ?

Makkurame, changmakura, pahlemmura, laipahngra

Dunpu ai pollya kaarhoibeini pwura, rahnnicha limri

Nungkangaini mallaokrillei, paalna yekkwulkhi hoirouwa

Yaa-kwul, waa kwul, thingkwulni yenkarlhuk hoirouwa,

Thangrou kousi yenhoiroulei Maringa Limso. Kousi

Hoirou wongu hungrou laipahng chahnra.

*****

RKHAHNG

Katleikhoutee Maringa limyei Rkhahng khothwungra,

Bangei Maringa Rkhahngso asinungri kourawu ?

Maringa khothwung kantangra Rkhahng katfwuntee,

Maringa khothwung kantangra Ngangahka Rkhahng,

Nangahka upa Rkhahng, Nangahka dou Rkhang,

Khothwung Upa Rkhahng, dou Rkhahng, kleime.

Khothwung Karlanga upa Rkhahng, dou Rkhahng.

Khothwung Rkhahng Nangahka upani thikuwl

Karlanga Rkhahng Karlang upani thikuwl, kraak,

Maringa khothwungra kleinung lhangaitee lamchat,

Khothwungni salldun, Nu, klou kandangme bangnungri

Neiishani Neiishaya Nangahka, Karlang chimpal

khothwung heirou Fwunglim-danlim loukanrekhoutee,

Asinungri Pa, pui, cha, char kannaymakni nuklou, salldun.

Bongnungri Dunpu ahya chiemakni thamiyakhi lhouhoimak

Rikkaray hoimak heiri Rkhang upani thikuwll, kraakpi.

Maringalim khothwungra kleinung lhangaitee lamchat,

Khothwung heirou salldun, Nu, klou kandangme kandang,

Nweiishani Nweiishaya, Nangahka Karlang chimpahl loupahl,

khothwung heirou Fwunglim-danlim loukanrekhoutee,

asinungri pa, pui, cha, char naymakni nu klou, salldun

hoinei Dunpu ahya chiemakni thamiyakhi rikkaray naimak.

Heingamri "khothwungra" Rkhahng fwunmakur ngammeitee;

Khothwung heiyei Rkhahng upaniri rkhahngra kraak, umfit
Kyatee, bommai chiemmai thami hunikhi malungkhamak.
Asi chahnyei kho upani, pastorni kraal thamiya kraakpi,
umfit toulanri lwoutangya thuk hoinaleitee ; asichahnri.
Rkhahngo, Rakhahng ,hungpirilu Rkhahngu, lim lhawo,
Rkhang neichahnyei Maringa karlang, nangahkari
Kammukhoutee Puiri-Pari, Nhulim-daanlimkhi.
Kandang-kanrekhi hoikhoutee Fwunglim-daanlimkhi
Seitakhi fwunkhoutee, Dunpu ahyakhi uk lumnakriltee,
Lwoukarban-lakarbankhi, uklumkanna hoikhoutee,
Rokaril-daankril hoikhoutee houklum kannaiso, bongnung,
Rkhahng, Rkhahng nangri Maringa limyei lillme lhame.
Lungsinatee bongei Maringa limyeiso Rkhahngso, kansear,
Kanrilbei, kansearbei hoimakarousatee asinungri, Maringa
yrengnichatee marchatani lhoupwum louhoikhoutee.
Louhoikhoutee Maringa thami Murr khanni lwungmak
Louhoikhoutee ngaalkril saakaril Hutthukril yamakpisoo,
Louhoikhoutee Hut thukkri thamini kraalsu, kangaalnara,
Louhoikhoutee pichaar, mitni kammu saakiso Maringayei,
Urrilkhoumaktee khriiso kraal kahuy leikrilbeinikhi,
bongnungri khuk, Upa, Naola, fallfei wong kannaime.
Machinkhoutee karhaakkhoutee khraam thamiya.

Asiyei lwaipang chahn aani lhangaimakya yenhoikuraa

Hoimaroutee Rkhahng nangni heisi louleiyanri,

Louhoiroutee bongei Maringa asinungkhi, lhangaini.

Asiyei Maringa Hummi un khupbei yaa thraang,

Hummi thraangnakrim, manimanung keiri lhangai,

hannuykhi malung kha hoimaknung waalim dounakrim,

Hoilei, urlei deiya marmuyna thangkhi, asiyei thamiri.

Maninung lamra Yaatangkrung, manimak hoilan

Hoilei Aarhong waalim uk marnimnakrimni doukar.

Makkuraku markumpirou, tanghakkei thamiso?

Bongei Rkhahngyei upa ahthang hoinakrimso heisi

Hoilanri asiyei upani mantrangrouso Maringa, limri.

Kwull klei Maringa, thang klei Maringa louhoiyarou.

Khothwung upani uk maryenglanri lim ayei Naoswun

Naoparrapri nungkhatnuyri deilimni thangkanna Maringa

Limso swuimakni yenhoiyeiroume Maringakhi, lwaipangra.

Rkhahng Rkhahng neiyei thangri lwaipang kandangni

Kanchanung thangme Maringa Rkhahngri lwaipangra.

*****

KANSEAR

Kansearme kansear lwaipangra Dunpuni,

Dunpuni kansearnakrim lwaipangra kansearkril,

Kansearme kansear lwaipang chieba lim kantangni,

Dunpuni kansearna lakrei lwaipangra kansearmakri

Lhawai kyaomak pwutlim aatomnime lwaippangra,

Kansearme kansear lwaipang chieba kantangniri, ahlim

Lwaipang aayei pwuri hoileime Dunpu ahni silpi,

Lwaipangra yukpina lakrei Pwukansah thamilimme,

Siilkanname siilkanna Dunpuni thami limyapwulhang,

kansearleime chiebani houthukni ahyei ahyei limya,

Kansearlei kansearlei chiebani houthukni kansearlei,

lwaipang kansearlei lwaipang lim kantangya Dunpuni,

Kansearlei thamini khinnyei hilthungni, hoiya wongya,

Kansearlei thamini lwaipangra dhwun chieba limya,

Yrengme darkar khoiyei hilthungni pwutlimya kansear,

Yrengme yreng khinn, yaal, wong karchu karchuya,

Kansearme kansear kanning kanningyei hilthungya,

Riing kyanung wai kyouna khinn dwongna khinn, kleime,

Markhullei, marngeilei khinnyei fallfei, khahng,

Kansearlei kansearlei khinnyei fellfei, marngeiya,

Hoileime hoilei khinn fallfeini khahngbam khat,

Yukkansear, loukansear khahngbam khatni lwaini.

kansearlei kansearlei lwaini annitamni karwolni khat,

Kansearlei kansearlei, karwolni karwolni lwainiso,
Markhullei karwolni lwaini swomthumni taangla,
Kansearlei taangla kansearlei taangla kwumnung.
kansearnalei taangla khatni lwun khat, kwumnung,
Kansearlei lwun katthi chiple khannibil, kwumnung,
Markhullei, markhullei, chiple khanni taanglani kwum,
Yenkarwollme, khinn swunna, lwainiswunna, karwolni,
Taangla swunna yenhoime, khat-hoime kumran kummahn,
Yenhoime yenhoi, kum karwoll, katyoume chaankaa,
Kansearlei kansearlei kumfalfei Rkhahngnung, falfei
O, malungsikannatee khinn khatyei wong heisu, chaannung
O, kansearbeikhi asiyei chaan arou wong heiya, hannuy,
Kansearbeikhi, kanrillbeikhi hoimarousame wong heiri.
O. lwaipang chaansim, chaan lhangai yenhoinung, klengni,
kansearnung, khinnung, khinn karchu karchuni hoinung,
khinn chani marchalkur kumri chaan, lhangai yenhoi,
raalkur khinn, kum, chaan, hannuy yenkallengmarou,
Kumrou hoinung, laanglam khinn, chaan heirounungme,
Chiebalim dwun khinn, kum heinung kanning hoinungme,
Pwutlim yreng, yaallei wong karchu karyalla hoime,
Kanserlei tang mandi, lhangai lhangaimak wong, kanrenung,
Marchallei, yaal yaallei wong karchu karyaalla karlhuknung

Kannailei tang mandi, lhangai lhangaimak, kanre kandangnung

Marchallei, marchallei yaal yaal hilthungni, wongnung
Kansearlei kansearlei yaal, yaallei wongnung sieng,
Hoilei siengkarchu laakarchu hoile fallfei khahng,
Thamilim hiilam nailamyei minlamkhi, marchallei
Hoilei chaa ranglamya Mo, Ko, Ang, Me, Mii Lei,
Kansearlei kansearlei chamin khahngbam waira,
Mommo, Kokko, Anga, Memme, Eiya waikannayni,
Yamakme laanglam aaya touchok daanchok lwaipangra,
Ariyame ranglam fallfei khahng Maringa limra, minlamri
Kleime klei nyulla fallfei khahng Maringa limra, marngei
Te, To, Tung, Sangkhu, Lei, marngeilei kanre kandangni,
Kansearlei kansearlei nyulla khahngbam waiya, uwungnung
Tette, Totto, Peppe, Khukkhu, Eiya asi nyulla fallfeime,

Touheimakme touheimak chamin fallfei toukarbaakri.

CHAHN

Chahn, chahn, chahn, neiya kansearlei,
Kansearthunglei lwaipangra chahn neiya
Bonggei chahn nangya koureinung hoikura
Kanloykarasa chahn nangya asinung ?
Bongei kleikhou chahn lhangai heisu,
Bongei chahnni asinungkhi louhoimakri
Koutounaiyo asinungri chahn nangya ?
Neichahnrouri hall khatle Lapa makkhai,
Asichahnrari lapa 30,000/- hoikurame,
Neichahnrou saang sangfai khatyei sikki khyum,
heichahnrouri dava (mitii) sear khatyei sikki
aangtuyei chahn arouri Dava Kg. rou lapa 10/-,
Rulei, ruleime lwaipangra fulchiyei chahn,
Bongei neichahnnung thamiyei ringnara
Kannayme tang-mandi, dhun, kanringkhi.
Koura asiyei chahn arouri thami huni, huni
Tang hoilei, mandi hoilei, tang thamini huwo ?
Lwaipangra asiyei chahn arouri mandi khoi
Thami kathchakhi makkurame, makkura.
Bongei neichahnrouri tang-mandi hoibeinikhi
Kannay ngamni ngaalkril, makme khatle khat

asi chahnyei lhouri karyoilei kanshamyei lhouni

Ariku chahn neiyei yenpi lhangairi ?

Bongei neichahnyei thamirungle,

Asichahnyei thamirung wongya

karlhik kannayku, neichahn ?

Heiiyei thamirungya hut-ho, kounhat

Mitmai kounhat kounhatni thami

khat khatyei rung louhoikhouwo ?

Bongei chahn heirouri thamiya mitra

Kou khoini mukarilna chahnno ?

Hoilei asiyei chahn arouri thamini thamiya

Uiswun waaswun khoini mitni thikarillara.

Thami khatnikhe anaksi, khatkhi anaksi,

Anaksi thamini khatni khatya thisitkril,

Thisitkrilnei ngamyei hungthukri, hoime

Maniya sangkana, ai ai maninungyatom

Hulkrilnarou, umkril. fitkril, hunghoime,

Umkril, fitkrilnei laltul, khii khoini singkril,

Naamba aso lwaipang kumoi hoinakarillei,

Lwaipang khiilaltul thoukrilnei kumoiya

Thipi thami hukhatkhi hungthukmakurame.

Lwaipangrei klei thamilim naambari asichahn

Arouri khiilaltul kumoira Heroe, Herointom.

Lwainisear, khinsear khiilaltul thoukrilnei hou,

Khiilaltul singkrilnei houni, lwaipang kanchaara.

Aangtuyei chahnri asiwong hoiraniri hilrou hungrou

Chahn heirouri lwaipangra pwu hoipirou hukhe makrou.
Yaalim, Waalimni lwaipang pwu hungkansa,
Hoimaniri makrouwasame hillei lwaipang chahnri
Chahn heirouri, kamit chahn hoirousa thangei chahnri
Oh, lungsinatee Bongei chahnso, kanril, kanrilbeikhi
Hannuy yenkalengmarouko Bongei chahn nangya,
Lhwungrei yenyoukur kuungyei tuisiirni, tienbeini
Faiira yongkurso, hungrouku hannuy lhwungra?
Oh, karngeibei, kanrilleime bongei chahnni neiya,

Chahnno, Chahnno, Chahnno lwaipang chahnno.

TAKKAA

Thami khoini Dunpuni ywukpilei, lwaipangra

Kouya hoirou, tourou thami hoikur ngamni ?

Pahmleime thami hoikurrei ngamniri,

Nei pahmri neiyei pahmme neinung,

Ai pahmri aiyei pahmme ahnung,

Faroume neipahmri nangni faroume

Hoiroume aipahmri ahni, ahnung

Pahm pahmya farilnung, kanchekme.

Hulrillei ningsun, nunghahng, rawai, masha,

falaan nungkangai hakarao, nei shalungra,

Neifari neiyei hoikurame, fakurame,

Ahfari ahyei khoime, hilthungni ahkanning

Falaan hakarao, famanung lungkha,

Neipahmya huni fa yarouwu, neohmya,

Neiningya huni lwung yarouwo ?

Neinungri nangni hoiroume, lungnungei

Anungri ahni hoiroume, ahningnung

yanungri yani hoiroume yakanning.

Neining klungnung, kleime neinang,

Ahning klungnung kleime ahnang,

Kleime neinang, ahnang, watsahm makni,

Neinangkhe ahnangkhe kleime kanningso

Hut-hoo, mit-mai, mur-bill, naamba kleime

Neinung nangni kanchek, kantran, kanthram.

Ahnung ahni kanchek, kanthramme,

Neiyeini nangni farou, ahyeini ahni faroume,
Neihut, neihoo hiidani kanchek, neinung ngamme,
Ahut, ahhoo hiidani kantran ahnung thrukme,
Neitouni nangni farou, yahtouni yahni faroume,
Ahtouni ahni farou, kahtouni kahni faroume.
Kanchek thamini kanchekna kllaman hungfa,
Nangni thacha kanchekla thacha hungfa,
Ahni kwatni kancheklan kwatni yehnfarou

Rahtuy thamini kwatsam maknung hungfarou,
Rahthi thaminung thrukri matill dulthungme,
Takka thaminung thrukni kwatsam naimakme

  Takkaa thamini nungkangaina chahnfa,
Pahmya fanung hut-hoo, mit-mai mantrang
Paangkall-ludok khin khinrou yrengme,
  swuimarou krakna, yrengna lhaayei lhimso
Takkaa thamini kwatsam naimarou, fulchinung,
Takkaa thamini lwaipangra thuythi naimaroume.
  Takkaa lwaipangra nungkangai houklum,
Hoiroume Dunpu ai kanning lwaipangso,

Hoiroume lwaipangra, thangmun ramnaksini.

TANGHAK LIM

Dunpu ahni limkhat khoini silkhoupi lim Maringa,

Lwaipangra limni yrengcha hoinung martumpikhou,

Martumpikhoulame Dunpu ahni Maringa limnung,

Limyei youkanna fwunkhoupiya yrengchame Maringa,

Lwaipang lim kantangni kanthangkanna Maringa limme.

Lwaipang thamini hoinung sarung kannaal, kansham

Sarungra firull karlho baangkhei, bongei chahnrouwei

Chakamay simmkhei, thwungkhei, marthing, pahmme,

Lwoukyun-laasa, kallaa, rumpikei Maringa hoikhou lim

Maringa Maringa deilimni kanthangkanna Maringa.

Louyao, lourup khoini rup kleikhou Maringa, lim.

Khofwunnung lhwunglim, mollim yengkansearfa,

Karyoi mollimra khofwunnung tuiiso kansear lamkrini,

Tuiiso kyanara khofwunnung mollim thlei toukyem,

Mollim thlei toukyemna biira saang pwum sing lok

nasa khatnung marsaalkhou, thirou, workhou saangpumya,

Maringa limni karyoime karyoi mollimdwoura,

Kandangna, kwarna mollimbwung karyoime Maringa,

Khokhatle khokhat, houkarbaan kandangna, bwung,

Khobwungrei houkarbaan kandangna mollimbwung,

Khobwungrei paaokril-fwunghou-Daarhouni, paaolaaso

Kartinkur mollimra nasakhat khoukur saangpwumya,

Hungsearnarou kwatsahm hoimakna mollimra khophwun.

Lim hungkanthouna Wasafai-Mongsafai, Kulvi songsong;
Limkho khallu-khattee kannay, khallu-khattee polthung,
Kho waira lwouthuk-lathuk, khochearnung loumarkamna,
khallu-khattee polra loumarkam lhangaimak paaolaya.
Kholim thami sakrung kwarnung tuisora bucha, Dunpu biira,
Khothami swunnanung kholhamahl fwunbi bucha, Shapu biira
Kumchaan ran hung polthungrou loukroo, loumarkhul lhak,
Thuithi-laathi paolaa, kallayna polthungra louthing, loumarkam,
Khowairei lhangaimak palthungyei puura thulthut huulthut,
Arime, ari tanghkei Maringa kho kanrena lhari, khothwungra,
Silnakhoupime Dunpuni kwatsahm makni Maringa limnung,
Heiyaso asi chahnyei thamini karhaakna hoinarame, bongeiya
Oh, karhaaknung lhang Dunpu ahminra maryunbanglanri,
Lhangairoutee Maringa Dunpu minra thangklei limso.
Dunpu ai kanningri limnung khoi lhaya, lhangai hoinung
Mandur kyao workhoubei limyei lha tangbangkyar, hoikayar
Hoilei Maringa wongri Maringa limnungei hoimakleime,
Koura kouya hungroulei mumanmak Maringa lim, tanghakso ?
Neiyei pwulukpak workhoubei dei pwulukpakya khruplei
Dunpu ai silpikhou Maringa lha, kawar heiya, kharukya
Koura, koura kanwairawo, bangei Maringa lhari asinungri ?
Kansearthung, marpilthungna khinnso, hoiroulei, kouninung

Yenraal-yendumkurni haalrouwame, heiyai wongso.

Maringa, Maringawo uksa kannaybam thukkurame.

Kanwang-laasear Maringa yenhoinung, khinnrou

Yendarou soola tuisiirso, yenkungrou, kanril mityuii

Kanlhayrou bouwa deilimni, heithinarou, lim aaya.

Yenkansworou khinn heiya hungdale, yasoolung,

Heiriyaku Maringa limyei neikanningri wongri?

Oh, Bongei Maringa limyei louhoikhou lhaya,

Touheimakme upa lwouya twungri, dwouwani,

Kan-aan yamakme upayei lwoukartin-lakartinya,

Touheimakme upayei murrlam maibong karom,

Yamakme, upa kya yaomak lwoukansear-lakansear.

Karlang-nangahka kanchaina kha-ang bwom,

Karlang upa kha-ang, karlang dwou kha-ang,

Kha-ang, kha-ang, nuvi-pava runghut martupina,

Nanghaka upa kha-ang, nangahka dwou kha-ang

Kha-ang, kha-nang upa ahlwou hiknung yamakna bii.

Inn, innmaiswut, innchoo, kamput, Maringa li Inn

Innchoo, innmai, kamput, kallheinicha, raanicha yamak,

Touheimakme touheimak Maringa inn, wong waira,

Kannayme innwaii, bam-bamlill, bamcha. piipa naola,

Kha-ang upa kangeina kaarhoi kantikna taanti, kleime

Khoime tikruy pwumni kha-ang upa hutni ombei kraak,

lwoukanre-laakanre kha-ang upa murrni, kangai kanre

Yamakme kansothramnung hill thiinung, kraalyei taanti.

Kha-ang upa lwoudan-ladankhounara kaarhoi

Touheimakme touchok, touchut bam bamya.
Bamkok, chopchoo, syeifwu bam, tuiikhang bam,
nuvi, pava omna, swutlai, pwongsang, lhaillou, omna,
Innchwo, maiswut, twulmuk, saiikhaang, daangkodaak,
Lhouva omna, upa omna, khwulram omna, dwouwa omna.
Hoime masanung rakha-ang kaana khinn, chimreinung khinn,
Martupi, marno karil rakha-angra houkalumni, kleime khora,
Kleime rakha-angnung khinn, chimreinung khinn, klaini
Yamakme khinn khinnya karlhikri, kan-aanri, kha-ang kanung
Hoime karbaankril lhangainung fwulchi chahn rakha-angra
Patar-Nutar, Nuvi-Pava, Momo-koko, Tete-totto, Anga-Meme,
Peppe-Khukkhu, Eiya, Teivi-Nucha, Pappa, Ninni-Marang,
Nicha-Marang, Kateinao-Teinaovi, Palluy, kapuy-kapuycha, Mannei-Manneicha, Pucha,
Nute, Nuto, Nupe, Nukhu, Nukham, Putang-piitang, Puppu, Upa-khwuk, lhamal-
polthung, Khulpu, Khullak, Wairok, Rukraak, Meilampu, khaangsillak, chaangruy,
Khochingsang kha-ang bom-chingsangraak, kholim Meilampu, Taoram, Swouram,
Rilram, Tamloy, Thiem, Laarung, Seiirung, Fwungruii.
Dunpu ahyei biirari hoirou machinkanna, Touhei-danheimak yai heikanna,

Ruwng thlei karmanmak yuira klei khangnak,

Oh, bii kannaymak, baal fwunmak lim

Uparapya thami khoini mupimak thani,
Upanung bwom dwouwani thraammarame.
Rikkarai, chithwun yaomakura, thingtaar hoira,
Lapa-sina thraam ngamni dwouwani upa kansa,
Thraii lwourari nungmit-taangla loukamuriini,
lwaipangra upa khoime, Dunpuyei laanglamme.
Oh, mumakuratee fwunglim-daanlimkhe, kanreni
Dunpuni silnapikhou fwunglimso marchok-chaichek,
Mumakura beso-bebaal mumakurame asiyeichahn,
Oh, lungsinaleime, rungkhat hoikhouya yenchaichekbei,
Hoiroulei rhuy wongnakrim lim haar-haar chaichekbei,
Bii kantangra Ocha yrengnung, hiilam-nailam, thimakura,
Karkaonung khrukya puhutthulla hoirouku Maringa ?
Yenworkur, yenworkur kluileri limyaal mumarou,
Lim kmitkur heirouri yenkansear waikypu hoirouwa,
Dunpunung, lwaipangnung laanglam kandangmakura,
Murrlimra khuiyui, ukra khrufwum lwaipang kouninung,
Lhangaiya yenhoirou, oh Pava-Dunpuwo asichahnra ?
Ocha minlam lwoupuwm kouwu

KHINN

Krume, krume, khinnri lwaipangra krume,

Khinni thami fwulchi chahn khoime khoi,

Khinn, khinn, khinn lwaipang chahn sihmme,

Khinn khinnya, yemarkhulbe khahng bahl hoime,

Bahlkannaymak lwaipangra makme, pwutlimkhe,

Bahlni wong lhangaile, hoime naam lhangaiso,

Lwaipang bahlri khinnme, fulchiyei chahn hoime,

Khinn, khinn karchuni hoiklhonme, fulchile,

Khinnri kalluy naimak, nilsona kantangra khinn,

khinn kyaome, Chieba limra, chakamaina khinn,

Epna khinn, kanthouna khinn, kanchakna khinn,

Karngana khinn, twukna khinn, kansaina khinn,

Karbaanna khinn, markumna khinn, lhirna khinn,

Marngeina khinn, hakaraona khinn, houkalumna khinn,

Khinn, khinnrou kanchakrou, kansairou, karbanrou,

Ngaakpimak, karngeipimakme khinni, neiya,

Khinnya kumumak lwaipangri thingtaarle khatsime,

Khinn, khinnung lhou falfei kleime. klei, laipahng chahnra,

Khinnyei lhou, khinn heirou hoiyarnungme, kandangnung

Khinni thamiyakhi, lhouyakhi karngeipimakme,

Khinnya, kounikhi, hunikhe powl toukhramak,

Lhou churna khinn, lhaana khinn, marhuyna khinn,

Khinn, khinnyei lhou chur, lhouni khinn hoikayar,

Khinn karchumakna lhouri takkamakna lhoume,

Takka thamiri khinnya kumume, ahfulchira lhangai,

Lwaipang arou thamilim hoilanri takka hoibamme.

Khinn, khinn, Nuvi-Pava karsilna khinn, lamkri,

Nuvi-Pava lhimra marnona, martuna khinn, kwar

Nuvi-Pava hwolerei khinnri Dunpuyei khinnme,

Nuvi-Pava lhimrei kanchaina khinn, kanthangna khinn,

Nuvi-Pava karyomna khinn, Nuvi-Pava rhumpina khinn,

Khinn, khinn, khinn, dwouwa khinn, upa khinn,

Kanwaina khinn, yenkarsilna khinn, kanloyna khinn

Kanre kandangna khinn, karbopkrilna khinn,

Nuvi-Pava thikulpina khinn, ywukpina khinn,

Karsilna khinn, Nuvi-Pava hunghoina hoina khinn.

Oh, Nuvi-Pava hwolerei khinnso rahllarame,

Hannuy kallengni Nuvi-Pava hwoleerei khinnso,

Katningthutlan malungsikanna hoirame, Nuvi-Pava,

Asinungri kat-hoilei Nuvi-Pavi hoinay khinn,

Oh, malungsukanna, Nuvi-Pavaya marsaalna khinn,

Oh, Nuvi-Pava, chaya Nuvi-Pavani katmarhuyso,

Hoyame nacha kakhi nayurapyei Nuvi-Pava, touso

Malungsikanna nuvi-pavaso nacha kayakhi,

Nuvi-Pavayei kleikhou thang heinakrimso.

Nayurapya hoiyarpilo yai malungsi-Nuvi-Pava;

Nacha ka kanrill-kanrillni lwaipangra kleithung,
Kleithungme karkaopimakni Pava Dunpu,
Ahyei biira neicha kayakhi loukarngeipilo,
Neicha kanikhi lwaipang khinn luylhakkhoubei,
Nuvi-Pava narungyei hochunya yilbeini, hungrou,
Pava Dunpu ahni kanung, martumkhoupina
kalla-kannang makna lhawaiyei, lamra hungrou,

hannuy murilthowase kai Nuvi-Pava narungkhannile.

PWU HUTTHWUL

Hutthwull, hutthwull, man kalluyei hutthwull,
Lapa sina kleibeikhi klownung manimak hutthwull,
Hutthull, hutthull, mankluyei hutthull, thang all
Malungsipikhi Dunpuyei, hutthullme,
Pipi, lahnbangpi Nuvi-Pava hutra kwarso.
Dongkham kannaymak hutthwull allso,
Kanchailei Dunpu ahyei lahnbangpi hutthwullri,
Hiinay, yenrahnme Dunpu ahyei hutthwullri.
Kringpikhi, lungsipikhi pwu hutthwullme,
Kansamnalei ahyei lwaipangya thamini,
Hutthwull, hutthwull man kalluyei hutthwull
Lwaipangya masahmbangpi hutthwull,
Kyunnarou dongkham kannaimakni lhangai,
Kansamnalei limrap, thami, chieba, pwutlim.
Kansehrpilei thangmun, simlei khanniya lhangaini,
Kalhonpilei lim naamya lwaipangra kanreni,
Klume -klume Dunpu ahyei hutthwullri
Hoiyarpilei lwaipanglim naamyei wongya,
Pwu rung khoini lwaipanglim thamiya, ywumkpi,
Kansearpilei thamilimni lwaipanglim kantangya,
Kansearpileime pwu rung thamiya Dunpu ahni,

Thikullei, thikulpilei kamme-kwar kantangra,

Dunpilei thamilimya Dunpi pwu Dunpu ahni.

Malungsipilei thamilimyei kanchakna, kantangra
Thamilim ahyei kanchakkur lhiimso khoupilei,
Marsiklei Dunpu ahyei biira wailam kannaini.
Dunpu ahni kartinpikur fwulchiyei chahnso,
Silnapiroume nungkhatnuiri ahyei lhawai ahnung,
Lhawaira fahcharoume lwaipang chahnyei hoikurso.
Oh, farouwame lwaipang chahnrei hoikurya,
Lhangaiya lwaipangra hoikhouso lhangaini,
Lhangaimakya toukhouso lhangaimakni hungfarou
Faroume lhwaira lwaipangrei toukhou wongso
Kallaman, swuimaknung martumkhou lwaipangra,
Ahsani lhawainung lwaipangrei martumchame,
Sahpu Dunpu ahni lhwai kantangnung hutthwulso,
Kharuk khannitamya martumpikhoupi, hutthwulso,
Hoira khatri lhawainung, khatri lwaipangnung,
Thami kantangni faroulei kharuk khat khatya,
Aarime kharuk khatri kammit naimakyei biira,
Hakarao kharuk, khatri kammit naimakna biira.
Dunpu ahni lwaipangra karingpina Hutthwulso
Kraang heiya karlhit manimakrou hunikhi, kharukso
Lwaipangra nungkangaiya fahrou, lhwaira kalla.
Lwaipangra kalla fahkur lhwaira hakarao

Khatri swuimakni fahroulei hutthwul kharuk heiri.

Kouriyo ai fakanni kharuk Hutthwul heiri ?

Hutthwulme Pwu ahyei laanbangpi hutthwulme,

Lwaipang lim kantangni fahnungei hutthwulme,

Hukhatnikhe karlhik manimakrou hutthwulme.

Marnimlei hutthwullni-ara, ase, thilo, loulu, hollu,

Mallaopilei, khinsearnung kwatshm naimakni,

Khannara whakalunpi, sao-sao, klunpilei thaminung

Lhangaini kartinna khinn asinung, asinung

Asiyei khinn raalkur hannuy hungmarou,

Soolani paao hungklun hutni, hwoni hakarao,

hwoni hutya kumutpi, koura, koura nhottek.

Fahla kluinaimak nungkangaiso, lwaipahngra,

Hakarao fahla nungkangai hoira, lwaipahngra.

Khanni lungrou nungkangai khinn heiri kouhoirou ?

Oh, klumkur khinnso ywukpwu, sapu ahyari,

Oh, lwaipang arouwei rahllorou ningmumak,

Oh, Dunpuwo, kouya hunghoirou uksaleime.

Dunpi pwuwo nei hutthwull lamswoo, lambahn

Kourawo, kouriyo mumanmak lwaipangurame,

lamswooyei biiminri khilamswoo, riinglamswo,

Karkaorou, karkaoroume lamswoo biiminso,

Kumuneikhi uksa-dansa leimarou, kharuk heiri

Nungkangai-hakaraoya kansahmloubei kleikura

Oh, lamswo heiri, khilamswo, khringlamswo ariyame,

Khilamswori lhangai yearyear, laak maryhame,

Ringlamswori laak, mandichame pingme, dhame,

Lungkarillei, lungkarillei lhawai khilamswoya,

Hakaraolei, nungailei lwaipangra, khilamswonung,

Lwaipang nungkangaini krungbamkhe yenthulpilei.

Kallayei lwaipangni, lhawai khring lamswonung,

Urlei lwaipangra pwutkhritya, laokannayei pwutkhrit,

Thisitpinei pwutkhrit,Dunpuya China pwutkhrit

Malummara pwuhutthwul kleime touso, laipahngra

Marchallei khilamswonung sillungni, lhirlei lamswo

Thamini thamiya thami khoini loupimaklei,

Lhawai kyaoya thingtaar khoini khallpilei,

Karulei karulei pwuhutthwul karuleime lwaipangra.

Hakarao nungkangai, khilamswo kayunri,

Uksamaklo, uksamaklo neinung khrukso

Nungaiya lwaipangra, kalluy naimakni yreng,

Oh, lwaipangra urnichakur pwutkhritni, hoirou,

Oh. lhawaiyei nungkangaina thangri, karume,

makrou dongkham, lhawaira nungkangaiso,

Karyoileiso, papnaleiso khilamswoyei pwutlimri,

Naimaklei dongkham, nungkangaiyei wailam,

Angturi khat, ningani khat, falfei marngeilei.

Pwuhutthwull lamswo poochokkur, kalalkurso

Kallame, toumalhang kallame, hoikurso hoirame,

Hoibangnung kanrethungnungme lamswo heiso.

Kwat naimaklei khilamswonung palluyri, marngei,
Kwatsahm makna khilamswoyei palluykhahng,
Marngeilei khilamswo rakhaang falfeiso laipahngra,
Lwaipangrei kharingei lhawainung, uklum, hakarao,
Rham klumkur lwaipang thamime, lwaipang worbang,
Lhawainung kharuk paammak lwaipang thami,
Mumanmaklei kouya yenhoirouwu, lwaipang rahlrou
Lwaipang klei naam aiai waisorou, pwu Hutthwulra,
Aangtu klei heisi kleirou, kalluy naimarou nungkhatri.
Mayekhoupila Dunpu ahni aiai rohsok, aiai machalra
Aiai cheeng dohnsona kannai, waihungsworou
Rohsok, cheeng, hunikhe toudeatri manimakme.
Koura, cheeng kalluyle koura karlheirouwo ?
Lwaipang lim, chieba, thami pwutlim, naambaso
Yenhoirou nungkhatnuiri, tarr, taar keam, bwut,
Lhawai lim naamba doubeinithral kleimakrou.
Lwaipang lhou kalluynakrim, kalluyme thamiyei chahnkhi,

Hannuy kalluykur chahn hannuy hill yengkallangmaroume,

KANRIL

Nuvi Nuviri, fakhoumakurame,

Neicha keiyei sefa, heiso, Nuvinung

Nuvi Nuvi malung thramakurrame,

Neicha keiri, neicha keiri, lwaipahngra

Neicha keiya thami hoi yanung,

Louurkhourouso kallayei pwutkhrit,

Pwuyei foor khoini neicha hoinungei

Pipikur neicha keiri Nuvinung,

Dunpuni lanbangpikur lwaini, khinn

Heirou waikyoubeini, sahrungra

Kallayei putkhritya kat-urkurme,

Nuvi Nuvi malung thrammakurame,

Nuvi neicha keini Nuviya nwuman

Lwaini khatchakhi rumpimakme.

Rummakhuyme rummakhuy, Nuviya

Koungamyei warpikhouwo neichaya ?

Lwaini somthumni Taangla, lwunkhat,

Lwaini Macha Khyum, lwunchip,

Urnichapi Uk rilra neichaya, kallani

Taangla lwunchipya urnichanei, kallakur

Kallakhi dhambangnung hanuikhe Nuviri

Neicha keiya lhangaicha hoinung nungkro,

Nungsayakhe ningwoibei, nuvini

Neicha keiya simbahng, urnicha,

Lwainirou waikyoubi, neicha keiya

Lwaini chahn hungle, lwaipahng

Neichanung, liimnung, nuvini mani

Lhou churnei kallaya mathrilmakni

Dopbangloutho hannuykhe, nuviri

Nuviyo Nuvi, neicha keiri,

Malung thramso hoimakurame,

Neicha keiya simbangnei, kallakur,

Neicha keiya marhuynei, kanthramkur,

Katmaryunbang kallaso, dhambong

Dopbangloutho hannuykhe Nuviri.

Nuviri kansoo kantik wangwaira,

Keiya heinanung singnanung,

Ruypime, kwarnung neichaya,

Nuvi Nuviyo, Nuviri neicha,

Keiyaso malung thramso,

Hoikhoumakuratee lwaipangra,

Neichaya hoiyarnung kwarso,

Workhoubei rikraiyei Pwollya,

Raantatbei, kaarhoibei, pwollya,

Rapfa rapfabei Kra khatnung,

Nuviyo, neicha kaya ywukpinei,

Raway Kra, Ningswun Kra,

Nungkhatni yenfaya lhaang lhaang
Nuvini neicha kaya, lhangainung
Kringyei ngamni Nuvini,
Yenkansear yenrapfa heini,
Neicharapya ukwai thimnung,
Marlhome martumme, kronung
Samyaak sikkiyeile, kalhonni
Seii hutthum khatle, yuiira
Butporbei martumpime.
Nuviyo neicha kaya, ringnung
Katyuknei pwutkhrit urso
Kouyai khinnrou, lwainirou,
Workhou Hoiroulei Nuviri,
Neicha kaya ywuknei kalla,
Lwaipang thamiyei thuithiyei,
Heikartinpi meisayei pwutkhrit,
Khoruy heichapnei pwutkhrit,
Nuvini neicha katywknei.
Lwaipangra malung thramakurame,
Nuvini nungkhatnuiyei, rapfanei
Kalla man yenfani, pwutlimou
Chwungkee bwurrya, kraanung

Khrilloubi Seii thachale marchok

Markapbei neicha Kaya,
Katyukpime nuvi nangni.
Manicha lousing pahngkalni,
O, Kallaso Kallaso, lwaipangra,
Dunpu ahyei Pwollya, kangeibi
Karwoimaknung lwaipangra,
laokanna famaknung, nuvini.
Kallakkanna Nuvi fwulchiri,
Nuvi neiya rumbaang, karyom
Maninung cha pipaya kwarnung
Maryunbang lahkkanna.
Nuvi neiklla pwutkhritso,
Lwaini lwainiyei katduybang,
Khoyei ruiini heichaplhak,
Urme, Urr Nuviri, kallayei pwutkrit.
Cha runglhang khoruiinung,
Hoora, hutra hidabeikhi,
Kanthram, Kanthramkur,
Nuvi neiyei kaningkurso,
Lwaipang thamini heithuithi,
Neicha kaya, Nuvi neiya,
Toumhitnung touchopnung,
Rikkaray fayarnung, kayarei

Heimaraang naamso, kanung

Kamume, kamu Nuviri, naamso

Lwaipangyei heimatwuya,
Loukardhou thang kleime Nuviri,
Neicha Pipayei cheii chip kalung,
Pipa daakra cha napung khyum,
Workhoupi, Pava ahni kaya.
Thuithi lathi kalkurtee, lwaipahngra,
Kallame kallame nuviri, lwaipahngra,
Nuviyya heikarsang raalbomso,
Kallani manikurme manikur, nuvini
Pwu Dunpu ahni Nuviya, karingbe
Rumpi, thikulpikur Dunpume,
Marthwummakme Marthwummak,
Cha napung falliyei Nuvinakri.
Rumpi thikuulpi lwaipangra,
Nuvi ahnung Dunpu ahtomni,
Cha kanung, Dunpule Nuvime.
Nuvini raalbomkhat manikurle,
Ahcha kaya lhakbangpi, nuvini
Thang duibang choubang, thang
Hoinung chaya kwar thami.
Kangakme kangak neicha kani,
Nuvi neiyei fwulchi falfeira,

Katkardwoukhou raalbomrap,

Nuvini neicha keinung,

Searpikur wailam heiya,
Swonung keini wai kanthram,
Katyoukur keini wai heiya,
Karyompikur Karyompikur,
Lwaipangyei khoini Nuvi,
Thrailamra kemkur Pavale, Sapu
Neicha keiya karyompi, ruipi,
Fwunloula neicha keikhi, thami
Hoinung maibongrei fwulchinung
Lwaipangra thuithi lathi, fahkhou,
Hoikhou heiya, hoinung lhangai.
Martuchame neicha kei lhangainung
Nashanungri Bomka meira, marno
Bomka meiruy waangra, kwarra
Khupni hal Unn haardhoura,
Nasa raalkurle lwainiyei kwarna,
Thami houdaina Uyok waira,
Uksa-kantik-kanchun, machi
Kannaymak kannaymakme Uyokra
Neicha kei fwulchira, Dunpuni
Ruiipi kalhonpi ngamni keiya
Sapu Dunpule kemkur Pavani,

Lwaipang Nuvile thamikhatle,

Ruipibeini neicha kaya, ruiipime

Katyukpime Nuvini napuiya
Hoinay chahnlhouso, lwaipahngra.
Nuvini kallakhou fwulchiya
Kouninung kalla thramrousoo
Hoikhoumakni lwaipangya
Neicharap, neimourap, naamya,
Neiyurapya neikalla, lwaipahngra,
Thramkurnakrim khinn, baichaya
Karsaangmakni toumallaokhoupi
Heiriyaku Nuvi neiyei, fwulchiri
Lwaipangra kalla mathrilri?
O, Nuvi neicha kani, nuvi ringeinung
Neimourap, neiyurapni, lwaipahngrei
Nuvi neinung sefa lhangaini
Kai malungpilni touthungso hoimakura,
Manithungmakurame, Nuvinung sefa
Nuvi neicha, neimou, neiyurap
Kaya Pavanikhe Nuvinikhe
Na lhawaira Soolungrakhi
Yhoukha Toupimaklo, nacha kaya,
O, lwaipangra Nuvi-Pavayei
Fwulchina chahn kani kumunung

Kanrekhramak hoinei ngamni

hoikurasame pelkayar manimakri

Nuviyo Pavawo, lwaipahngra,
Dunpu ahni neicha, Neimou, neiyu kanung
Lahnpikur hutthwul Rosok heiya lungbanglim
Lwaipang aarou lhangaiyei Lhoura kwar thangni
Ruichingpilo, thikulpilo, rakolpilo, kansearpilo
O, lwaipangya raalkur Nuvi-Pavani neicha kaya.
Thikulpi hoiniyasu Sapu Dunpu ahni Lwaipangra kaya.
Hoikhouweisee neicha ka Dunpu kanning dakra
Ringchayeisi Pava Dunpuwo, Malungsipilo kringpilo
Neicha kai Fwulchiya Karsaangnung touyaangpilo

Neicha kanung Pava Neiyei pipikur hutthwul Rosok heiso.

Website aayei pagerap

Maring Books

MARINGA LAA

Preface

Khungkaapnei Laa

Laa No.1 : Lamallei thimi phulnei Laa

Laa No.2 : Malaa Kaapnei Laa

Laa No.3 Khul kuinei Laa

Laa No.4 Nuinanungei Laa

Laa No 6 Thirrui Thounei Laa

Laa No .7 Liklha Bongbarnei Laa

Laa No 8 Wachangnei Laa

Laa No 9 Cheemwai Wachangnei

Laa No 10 Wakarkhulnei Laa 1

Laa No 11 Wakarkhulnei Laa 2

Laa No 12 Thulnei Laa

Laa No 13 Lam Loukhainei Laa

LAM LAINEI LAA

Laa No 14 : Yulso Lam Lainei Laa

Laa No 15 Phalbung Phalnei Kwaangla Diknei Laa

Laa No 16 Khawang Lananung Laa 1

Laa No 17 Khawang Lananung Laa 2

Laa No 18 Yuisho Lam Yunei Laa

Laa No 19 Paar Laanei Laa

Laa No 20 Paar Naanei Laa

Laa No 21 Thambo Naanei laa

Laa No 22 Sham Trulnei Laa

Laa No 31 Hungkarkhulnei Laa 2

Laa No 32 Nuilak Hungnei Laa

Laa No 33 Cha Laa Lamlainei Laa

Laa No 34 Molbung Laa

HINEI LAA

YAREKNEI LAA

HANG SHAROI LAA

Laa No 108 Cha Bunei Laa 2

Laa No 109 Thirdar Sainei Laa

Laa No 110 Nao Urnei Laa

No comments:

Post a Comment