Announcement: We regret to say that the book Maring Phonic tone which was published earlier in this blog was not edited very nicely. Therefore we are uploading the edited book which is very easier to read than the previous version . We suggest you check it out the new version. As always we welcome articles and suggestions from you all.Maring Progressive Forum wishes you a happy and prosperous Christmass and New Year to all its readers.Thank you for supporting our endeavours to develop Maring dialect.

Hou Ran Online : April-May-June 2012


                 2012 rou Matric prikhara 18th position dakur               Morungpham(Gideon) le wari sakril

Matric topper Gideon ( Morungphom ) le Hou Ran Journal ya publish tou Maring Progressive Forum yei executive rap l



Imphal Phulwa 18:    Board of Secondary Education, Manipur rei kalou Class-X Examination 2012 ra 18th position khung  Ks. Angrung Kanshouwa, Lecturer United College, Chandel heirou Ks. Shanti Kanshouwa yakhu shangrammei khanitam kalung cha Keishang Morungpham (Gideon) Kanshouwa lê Hou Ran murilbi wari shanei paoyun:

Hou Ran : Lamkrini anakshi kheen pipi Dunpuya chouni mathanglei hei thangrou anakshi Maringngayei mai tangni yenthuk pi Louyang Morungpham, ukning pilnei salam kou kalohni nungkangai phungthutlei.

Morungpham :   Keiyei khi baimak nungkangai hoilei.

H.R. :  Nei maipak nei credit huinung pinilei?

Morungpham :  Nuwi-Pawa, Ocharab, Paluirab lê Dunpunung pinilei.

H.R. : Maringnga hoini Matric Prikhara nangni namrou wei rank chouni hungnarou nei ukningra kou khallei?

Morungpham : Manâk khad rari nungkangai hoilei heiya manâk khad rari wakhal sukna hoilei ngamri dei limrab lê markhe yainung 18th position tou ari baimak nimlei hui.

H.R. : Nung khadrou lailik pung kounak pâko?

Morungpham :          Nung khadrou lailik pung khani tomcha ukning kyaoni pâ.

H.R. : Nei rungchaannei pamri kouko?

Morungpham : IIT touni lei.

H.R. :              Hillei katyou maringnga marnorab nung kou yunni leiko?
Morungpham :          Kei yunkniri “Maipak touri kallei lakkana yei hilthung”.

H.R. : Maring Progressive Forummei phung Hou Ran nei ngamra nei yunkni leileiko?

Morungpham : Maringnga thimiyei kamu mutthutna khwaiyei tâng platform hoilei heirou ani Maringnga yei tângbangnara baimak  tâng hokârkhad hoilei toubi yunnilei.

H.R.: Kalengni mathanglei, nei hillei rungchaanrou Dunpuni kalohpi hoiyaso.

Morungpham :          Heini keiyeikhi baimak nungkangai hoilei.


            PMT yei topper lê murilbi wari sakril
MBBS topper Makunga Joysee le Maring Progressive Forum mei executive rap




Phunal Sambam, Thunma 17 :  Manipur Pre Medical Test 2012 ra passed toukur Maringnga napung ani min hoini :

1. Makunga Joysee Maring
M. Kodun lê M. Nagani (graduate teacher) yai cha, Phunal Sambam Yul.

2. Konaishang Ronglo
R. Koshel lei cha,
Khangshim Yullai.
3. Salung Morung (Sebastian)
S. Moses lê S. Rawonla yai cha, Leibe Yullai.

4. P. Messengeorge Dansgshawa Dp. Kodar lê Dp. Darshim yai cha, Khukarthil Yullai.

5. K. Moyangthel Marem
K. Khamsha Marem lê
K. Topem Marem yai cha, Saishim Yullai.

6. Hongsha Bongkimshaang
H. Amoshel lê Adi Hongsha yai cha, Biyang Yullai.

7. Dangsha Mothilphun Maring D. Memong lê D. Tomui yai cha, Marimchi Yullai.

            Ya napung ani lakra ST rank chouwei (3rd rank ST) hungkur M. Joysee lê Hou Ran murilbi wari sarilnei paoyun:

Hou Ran :        Reidang Joysee baimak nungngaiwora nei maipak heini  ukningra pil hei
Hou Ranni yunthuk kou kalonni mathanglei.

Joysee :            Keinungkhi heini nungkangai hoilei.

H.R. :   Nei maipaknei secret yunpilo. Nei maipaknei credit ri huinung pinilei.

Joysee : Dunpuya sak kamu heirou pui-pa lê ochaya chi rikkrai. Heirou credits ri nuwi pawa lê ocha nung pinilei.

H.R. :      Maringnga napuiya lakra Manipur PMT ra touri ralkur kum kounak rou youbi kumtu bilrou nangni rank chouchi lei. Heini Maringnga napuiya lakra rank chouwei hungnarou nei ukningra kou khallei?

Joysee :            Baimak nungkangai hoilei ngamri keiyei khalkhou heirouwei duini yenpha nei ngammei. Hilroukhi duini langai yenna nung laknarou.
                                       
H.R.:   Nei medical prikha nung marshik yainung lil hoiyei darkar hoi hei kouko?
1. Yai (Luck)
2. Lakna kal
3. Enviroment
4. Lapâ
5. Pui-Pa yei trumpi
6. Coaching Institute

Joysee :  Kei wakhal rari 1.Lakna kal
2. Pui-Pa, Ocha yei trumpi.

H.R.:    Nei katyou kur schoolrab yunpilo.

Joysee : Class X ni Padma Ratna (P.R.) Kakching heirou Class XII ni Millenium Institute of Science rei luilakkur.

H.R.: MBBS prikha lhanung marshik yainung heirou prikha lakrei nei suikur bai yunpilo.

Joysee :            Coaching Institutionrei ocharabbei shunpi takpinara confuse bai leikur. Heirou prikha lakra nervous leikur.

H.R. : Kounaksi guide ya nei yarengkur? Pradeep? Dinesh? Nimanung dei? Kou ngammei?

Joysee :            ABC ngamri keinung âni pânung nungkangai.
H.R. :              Prikha ânung koutoubi marshikrou/lailik pârou heirou pung kounak pâni lhangairou? Yunpilo.

Joysee :            Ngalapcha hoiyanung khi ukning changni pâni lhangai tou yunnilei.

H.R. :   MBBS nimanung MD loubi nei hilrou tounung lhou kouko? Civil services nimanung dei kou touweise khalko?

Joysee :   Heiri ningnga hilrou thibi tourouwa.

H.R. : Kâi limmei education tangbang choubang changmak â pui-pa rabbei nimanung douwa rabbei ruineiko?

Joysee :  Kei khalnarari pui-pa lê douwa rabbei ruimeh.

H.R. :   Asiyei Maringnga douwa rabbei meila tlouni duiyei yunkni kâi tlouri koukhi nimak naksi khalrillei. Âi ngamrou kou yunnilei?

Joysee : Maringnga khad hoini kâi tlouya yunyernilei. Pui-pa rabnikhi douwa rabnung yunmarno yer nilei.


Kalengni Shimbang nanung Kartuk

Yaipharok, Phulwa 6:     The Maring Students’ Union (MSU) ni North langrei klei Maringnga marnorabya lhangaini thilak pimak meh toubi ukning pilmakkei tloubam kounak marnorabni khoukur. Kalohni 1983 rouwei waiyoukur The North Maring Students’ Union (MNSU) hei kum kounak lhoutou makni loulei yanungkhi kalengni shimbangbi North langrei klei marnorabya lhaingaini thilak nanung toubi ralkur Phulwa 6, Cherni tlaini heirou MNSU committee ranni khalkur. Rannei khalbangkur lhou-ur rabri

1. K. Korung Kleya                President
2. M. Moshil Dangshawa        Gen.  Secy.
3. A. Korung Kleya                J / Secy.
4. Th. Mekhulji Kleya             Finance Secy.
5. Ks. Mongam Kanshouwa   Edu. &            Statistics
6. S. Mephom Dangshawa      Info &             Publicity
7. Ml. Mothil Kanshouwa       Games & Sports
8. Khulpu Shangkhu               Magazine
9. Ks. Khushim Kanshouwa   Treasurer


    Maring Literature Society (MLS) yei General Secretary le wari sakril

Phungthil, Thunma 18:   Maringnga yei Literature Society committee member M. Kodârkhum lê Hou Ran murilbi wari sanei paoyun:

Hou Ran :       Ochaba neiyei wakhalra Maringnga yei Alphabet lê spelling ngei ngamrou asi rampha solution yenchang mak â kousui lei neiko?

Kodârkhum :                Keiyei khalnarari kailakra lhoubam âyei subject expert makneimeh tou khallei.

Hou Ran : Ochabai khal nara, koutou lanung ri solution yen manirouko?

Kodârkhum :                Letter khad lib tou âri kaiyei indigenous wordsni librou heini dei limmei expertrab lê group discussion tou heini solution yenrou tou khallei.

Hou Ran : MLS yei churbang nung lhou koukou leiko?

Kodârkhum :                Alphabet mayebi spelling libbini lamkrini primary levelbil marno yerna nung laknalei.

       AIEEE topper lê mukril...
AIEEE rou All India khoini ST ra 6th rank daakur Molung Koyaingam Kanshouwa


Imphal, Thunma 20:      All India Engineering Entreance Examination 2012 rou All India hoini ST ra 6th rank hungkur Kiddies Corner School Chingmeirong ra class - X heirou Herbert School ra class - XII luilakkur kalonni class -XII hek luilakbi lhaini 24 tom engineering coaching toubi AIEEE ST ra all india hoini 6th rank phakur M. Kothil Kanshouwa lê
M. Temui Kanshouwa yei cha Molung Koyaingam Kanshouwa lê Hou Ran murilbi wari sanei paoyun:

H. R. : Louyang Koyaingam baimak nungailei duini mathanglei kalonni neiyei baimak tangngei maipak phanarou nei wakhalra kou khallei?

Koyaingam : Nungkangai heiya ukningra pilmak bairi klei ngamri kei toukhou lê result lê bai karlik leilei.

H. R. : Nei maipak nei creditri huinung pinilei?

Koyaingam : Keiya pukpi nuwi pawa, charyor teinorab, paluirab heirou ocharab nung pilei.

H. R. :             Nungkhadrou prikhanung lhim pung kounak lailik pâko?

Koyaingam : Nungkhadrou phung phanga malri pâ.
H.R. : Prikhanung kounak objective books pâko heirou koungammei?

Koyaingam : Kei objective booksri yereng chamak. Heiya ralkur prikha kounakrei ngaikur objective questions heilê formularab mayethudbi comparision tou ngamri ânak prikha nungri objective questionrab â baimakni lilkhoi tou yunnilei.

H. R. :             Neiyei engineerring luilakbi koutourou ningcha leiko? Kou ngammei..

Koyaingam : UPSC tou nilei ngamri heini Maringnga tangbang nanung louchur nara baimak keinung mantrang hoirou khallei.

H. R. :             Maringnga marnorab nung kou tlou yunnileiko?

Koyaingam : Kei yunkaniri Class XII courseya khaminni munanung lakkana heinakrimni Class XI course khi khaminni mulanungri baimak lhangairou.
            Heirou thimi deiyei marklê competition tounung lhimri kei tamtommei markya duini phananung lakkanani lhangai. Hei toubi classrei ocharabbei marno pikur hei namma lhangaini giyal dananung lakkana heini khawairou lhangai tou yunkani.

H. R. : Maringnga douwarabbei kâi tlou yunmakni Meila tlouya duiyei yunkril âyei ngamrou kou yunnilei?

Koyaingam : Kâi tlou yunmak â rikrai kana hoilei. Kâi mairei matil mathuklak lê malnalei toubi khallei. Heirou Meila tlou kyunni kai lim tangbangrou toubi khalmaklei.

H. R. : Hou Rannei ngamra nei kamu heirou yunkani kouleiko?

Koyaingam : Mathanglei, ngamri shulbi kalei Maringngaya Hou Ranni ngam hoibi tangbangrou khallei. Heirou tlaipang âni leileiyen Maringnga nung lhou churmani hoiniyaso.


Posted by 3 comments:
Subscribe to: Posts (Atom)