Announcement: We regret to say that the book Maring Phonic tone which was published earlier in this blog was not edited very nicely. Therefore we are uploading the edited book which is very easier to read than the previous version . We suggest you check it out the new version. As always we welcome articles and suggestions from you all.Maring Progressive Forum wishes you a happy and prosperous Christmass and New Year to all its readers.Thank you for supporting our endeavours to develop Maring dialect.

Hou Ran Online July-Aug-Sep 2010 Edition


HOU RAN
                                                                        (New Voice)
 ISSUE NO. 3            thehouran@gmail.com             MARWAN-KULKA-MANCHUN 2010

Pretty Maring Girls In all Their Traditional Finery

Editorial...
Maringnga Ramrei Churbang Scheme / Project rab

Maringnga ramrei churbang scheme/project chungni leilei. Yâ heiri Sarva Siksha Abhiyan, Mid-Day Meal, Water Supply scheme, ICDS scheme, heirou dei dei. Heiya yaithi khatni heinak schemerab â tek langaiduini churbangmakmeh tounarou kral hoimakrou khallei. Scheme kounak â thimi baiyei mucha-mumaina scheme hoilei tounarou loukchimrou toubi khallei. Mid-Day Meal, Water Supply scheme kounak churbangbikhi chêra tomnilei. 

 Heiya Maringnga kaiyei youkana khatni heinak mucha-mumai, tuy loubi lhouri toumak nimakkanung namyernung pishunda put kounak â loumuchâlei tou mubikhi koukhi yunthut naimaklei. Heiya ashitom heishi leiyanungri hilrou Maringnga kanung baimak mangchâ hoirou. Lou churmakkhi koukhi baimak, scheme yâtom hulcha hulmaibini ringmanirou toubi khal thimi â Maringnga ramra katchungbangkur â langai hutlhari nimak. Anakkei wakhal âni ka Maringngayei lakra râthinei wakhal chêlyerlanungri ka Maringnga â tek tangbang choubang changmarou. Mucha-mumai kni thimini thimkur limni koutoubi tangbang choubang mani rouwo? Kounak Maringngaya tangbang choubang yerrasi toulanungri kanamnung kakana schemerab â thimi baini mucha-mumai â thingrou dâ. Keichameh-keinaomeh toubi kalbangnei darkar damak.

RTI Act yei kakana kanam phamalna wasi. Khatni dei dei schemerab khi kalni thilakkasi.
Lam simyeinung quality mak-klei khi thiyasi, water supply scheme, MUA office, MNBA hostel luichangmak nei ngamkhi thilhakkasi. Mitsing-nasingni leiyasi. Ka Maringngarab, tlouyunthut changmak pang thiminak leimakkasi. Village Authority rabnikhi yul-yulrei churbang schemerabya kchimni thilakkasi.

Maringnga yei Education System

Nungkangai khatni angtu ka Maringnga khi MBBS, Engineering entrance examrou dei lim touri Khamawa, Vaiphei, Kom, Hmar kounaklê thirilnarou baimak chouni selection phâlei. Hanui khallanungri baimak pêlnalei. Heiya doctor, engineer khat khani tomni Maringngaya tangbang choubang manirouko? Khalnawasi, thimi namma Doctor, Engineer hoimanimakrou. Khatni, development tou âri thimi nammani lhailik laisu muyeinung tom hungrou. Matâng ârouwei shun kniri Maringnga yei education standard â choumakkhui. Lhailik marno phamakkei klei thimi chungni leilei. Heirou khatni baimak klaiyei, kommei Matric/XII prikhara silbi pass toukur, lhouri phachangmakni certificate tom chur thimi baimak chungni leilei. Maringnga ramrei klei uparab, yukkhalpilak. Pallel arearei Matric nimanung XII prikharou silbi pass toulei tou mubikhi mul klei â tangei langaimakmeh tou hoimakrouko? Ashiyei Maringnga marnorabni Pallel areara centre koungammei dâ-kani? Lhailik pâmakkhi silbi pass toumanirou tounei wakhal â douwarabyei ludokra leikor âni marnorabya nungkhatni suimakni mangyer rouwa tounarou kounak lalrouwo? Ashitom chashunda lanungri Maringnga marnorab â mangngu rouwa.

Puiparab, yukkhal pilak. Class X/XII certificate tomni ashinung kouya toumanirou? Heini, quality education leinanungei exam centre â strict hoiyer rasi. Kalni lhailik laknamak kanungri tek pass touchangmarou tounei wakhal leiyer rasi. Heinak wakhal leiyerrou toulanungri old course heirou new courseyei prikha â baimakni strict hoiyer rasi. Pura strict hoiyerbi rilrari free silyernei youkana hei bai dongyer rasi.

Maringnga kaiyei tlou (dialect)

Hanthakkei UNESCO yei listra Tarao, Moyon heirou dei dei tlou bai mitdura tounei lhouthuk â Maringnga kâlê mari baimak leilei. Maringnga tlou â mitmakkhui heiya tlou â tangbang choubanglei toubi yun-yâleiko? Kâ masâyei literature touri kanyerna (seireng) heirou wari-warêng kounak leileiyo? Tlou khatya tangbang choubangngura tou muweisi toulanungri tlou heiyei literature thiroudâ. Heilângra khallanungri Maringnga tlou â mitmak kanungkhi baimak tulbi leilei (thâk choumakkhui) tourou dâwora. Kai Maringnga tlou â tangbang choubang yerrasi toulanungri tlou â kheensêrrou yrêngcha wasi.
 * Maringnga kailakra pârton (invitation) piril yeinung Maringnga tloura maye rillasi.
 * Kummei Khristmass lê Kumran lhouronei duini kai limmei lhouthuk kantang ngei lhoulammei programme Maringnga tloura maye piyasi duini yrengcha wasi.
 * Khristmass duini dei lhouthuk ra Bible recitation heikhi kai tloura pâ shingna yerrasi.
 * Maringnga yei sillam rabni office circular, memo, muyerna (notification) kai lakra pirou dâwanungri Maringnga tlouratom maye piyasi.

Maringnga tlourei maye kanyerna heirou dei dei lhailik mayerabya ukning thoubang piyasi, yai maye lhailik rabkhi pâwasi neina malnawasi, kalal neimakkanung kwat sam kounak yaowanungkhi shunthutpiyasi.

Thakrei shunkur tlou namma â touchilanungkhi Maringnga tlou â tangbang choubangrou touri shunchangmak. Heiya ashiyei katyou douwarabnung Maringnga tlouya malungshinei wakhal chel maniyanungri nungkhatni nimanung nungkhatniri suimakni tangbang manirou toubi uklumlei. Khamawa tlouri Manipur Boardra tomnimakni CBSE rakhi marnoyerlei. Heirou Jawaharlal Nehru University rakhi marno yernanung kalni lâknalei. 

Kai Maringnga tlouri kousi toulei?

Klu lhourap

Kul              -        area/region                     

Hutlha        -        example

Râthi           -        lazy                               

Lhouthuk    -        function/event/happening

Lim             -        tribe/community/group    

Marno         -        study/learn

Ludok         -        brain                              

Tlou            -        word

Lhou           -        work                              

Kanyerna    -        poem

Tul              -        backward                       

Tool            -        rice beer



Lhouro        -           welcome
Posted by 4 comments:

Hou Ran Online April-May-June 2010 Edition


HOU RAN
                                                                        (New Voice)
  ISSUE NO. 2          thehouran@gmail.com             SUNNA-PHULWA-THUNMA 2010



A Maring Cultural dance in progress

Editorial...  
Mângkur kya laa/phungrol:

Yai lhangai khatni Maringnga yei youkana châkaril (culture) yaa malungshibi mângyer nimak thimi baini Maringnga yei laa duini phungrol â mayêthutbi khoulei. Heiya yai thi khatni laa/phungrol â mayêthut bikhi tune/beating mumaknei ngamrou kakanâ chungni maklei. Baimak uksâ laisânâ khatni ashiyei tarrayei chaan (generation) â raalkur hilrouri Maringnga yei laa/phungrol mukhei thimi makkurnei kheen hungthuk kya.

Kousi tousirouwo? Kânâm pulbi Maringnga yei laa/phungrol â video recording tounei darkar baimak hoiyoramêh tou khallei. Tuy, kheen baimak changkur kya. Heiya kaiyei Puiter-Pateryei lakkhoupi man naimakkei lal â maangkur lê huni duiyoh? Minni kânâm khallasi! Wakhal mandi thimini chungora ashiyei Maringngari. Keiyei cheemmaini lhou tang chur, officer nimak kanung tuy tangni chur hoinanung laknayen lim/chatiyei culture mângkurni hâlrouwa.


Wâkhal mandi makkasi, tangthutdasi. Kheen arou MUA yei Art and Culture Cell yei attention buchâlei.

Maringa chingshâng kartuk:

Meipou, 12 May 2010: Râlkur 6th May, 2010 Maorei thuknimak lhoubam thukkur heiyei ngamrou
Maringnga chingshângyei upârap, ochârap, yinglam kounakkei lu urpurap kounakni thukbini
Meipou Community hall rou kartilkur.

Heirou lil hoini

 i. Term luiyobikhi kheen châni election touthungmak nei ngamni election toubang nung hallei MUA executiverap ni lhun khyum caretaker hoipilaksu toubi darilkur.
ii. Kâiram rei thuk put touri heeng, chaa, shai duini kalei khou kya anna-louna phâi ramra malet yamakrou toubi darilkur.

 iii. Information centre khouwasi toubi darilkur.

iv. Râlkur 10th May, 2010 Khangshimrei thukkur lhoubam heiya khi yânimak phungthutkur.
Nungkangai phungthut:
        Dangshawa Angkham

Angtu keini HOU RAN tou ung tangla lhunsummei (quarterly) Houlâ (Journal) âya pabi thinarou baimak malungshina nungkangai puklei ngamri angtu Maringnga upathal hangra Lim (chati) nunglhim lhou tou thimi wâtdanungkhi douwathal hangra kâmaringnga Lim nunglhim wâdtourou (serve) thimi lei leimeh tou â muchanglei!

Kchim, angtu kâmaringnga â ipbi leinung kheen ningmakora, ipmak-neimakni, chamak-maimakni lhou pangbi leinung kheen hoiyora, mini (other community) pung fanga (five hours) lhou panglanung kâri (Maringnga) pung chip (ten hours) lhou pângrou dâmeh. Mini pung fanga lailik palanungri kâri pung chip lailik pâroudameh! Hei ningmakanung kâri miyei hil chanthung changmarou.

Yunneise toulanungri kâmaringa âri baimak tul limri nimak ngamri kâri nakedkhi nimak, tol (bread) shai thimikhi nimak. Bongei nutar pâtaryei chânrouwei youbi shrim (mithun) hatbi kumei toubini, tul mongbini, tui tuiya chakamaibi nungkangaini leikhou limêh. Khyingni yunneisi toulânungri kâmaringnga âri nungkangai duikur limmêh.

Yâithi (unfortunate) khatni angtu kâmaringa âni kalni lailik tambangna kheen arou khwairou lhangaimak gun culture, insurgent problem âni kâiya markholbi (disturb) leiwora, mi dei dei limri 60% lailik heibini officer hoibini Manipurei administration heirou shiruk yabi leilei. Kei yuniri kâmaringnga lhou tounung chungni leiwora, lhou tourou thimi makkura! Kâ kheen mângyer makkâsi, tuy mângyer makkâse, mitseng khângase, prathana toubini Dunpunung buchâwâse, mi IAS/IPS officer khatdei châ-nao le, Kâi mut thei yorbi anna-louna yorbi lailik tambâng châ-nao lê kou singkana yerou dâmeh.


Editorial...
MPF bei nammanung yunkni:

Maringnga ramra organization (sillam/yinglam) chungni leibikhi lobur (constitution) â kandang wâtnei ngamrou lhou churbâng yeinung baimakni problem leilei. Hutlha hoiyei shunnarou Maring Uparap Assembly yei executive (sillam) rabni term luikur ngamni ADC election issue, Muivah yei cheem kalêngnei issue yei ngamrou lhangai duini lou churbang changmakkur. Lhoubom â baimakni klu hoilei ngamri ânak klu kheen ârou Maringnga yei apex bodyni lhou touchang makkei leikur â baimakni dangerous hoilei. Hilrou ânak
condition kalengni thukmak nungei MUA yei constitution â shimchut yêrnilei. Term luiyobi khi emergency situationra election toubangyên caretaker executive leiyer nilei. Khatni yâwa nungri executive election â hilrouri kheen châni touyer paamlei.

Klu lhourap:
Sillam/Yinglam - Organization

 Lobur - Constitution

 Kandang - Clear

 Houlha - Journal

 Hutlha - Example
Kchim - Right

 Cheem - House
Sunna - April

 Phulwa - May

Thunma - June
Posted by 1 comment:

Hou Ran Online Jan-Feb-March 2010 Edition


  HOU RAN

                                                                        (New Voice)

 ISSUE NO. 1        thehouran@gmail.com       KUMKA-KUMSA-MATRAO  2010

               
A Maring traditional dance in progress




Kou ngammei HOU RAN phung:

Maringnga kashi khatle khat interact toukril, pao phaokril, kmu kounak leiyanungkhi shunthutril â baimakni watlei. Kaiyei lakra
          1. Upani - upanung
          2. Upani - douwanung
          3. Douwani - upanung
          4. Douwani - douwanung
kou shunkni klei, kou idea discuss toukani nimakkanung kouwa expect touwo tou - â     murilmaknei ngamni kai lakra communication gap tangni leilei. Communication gap â leinei ngamni development hoi manimak lei. Aanak communication gap â filled tounanung HOU RAN journal â   phungkurmeh.
Angtu ka Maringnga lim â baimak klu kheen hunglungameh. Kaiyei Kulyom, youkana, yrengcha phirul, maringnga lhou, namyer â mangkur yaanei kheen hunglungura. Aanak kheen ârou ka ipbi lei yaamak kura. Ka khat lê khat lhou taanarilnei kheen lungora. Ka Maringnga ri khatsi hoinei wakhal (sense of unity) tou â baimak watnei ngamni tangbang choubang makni leithungkurmeh. Aanak problem â namyer solve touchangmak kanungkhi Maringnga douwa khat hoini kayei manicha koukhatcha hoiyanungkhi toukhouweishi toubi HOU RAN houlha â phungkurmeh.

HOU RAN journal aa koutoubi phungrou:

Hou Ran houlha â tangla lun khyum kaalbi phungrou houlha meh. Houlha â special writer mak. Thimi  hukhatni  Maringnga le mari leikana issue touri sports issue, arts  and  culture rei issue, political issue,   social issue etc. yei ngamrou âyei mayekani hei mayepi yaarou.

DEI DEI churbangrou lhourap:

1. Internet blogging:
Hou Ran houlha âya hard copy ra paa phaamak thimi touri Bangalore, Delhi, Mumbai nimanung deiramrei leikurrap nungri internet ra hoini phungrou.

2. SMS service:
Hou Ran houlha lê mari leikana SMS service leirou. Maringnga lhoura
     a. SMS News Alerts
     b. SMS Opinion Poll
     c. SMS Discussion Group leirou.

3. Maringa yei ngamrou project:
Hukhat ni kounak lhoutou kaniri klei heiya tui nimak kanung lhoutou malnarou thimi kawaat leiyanungri Hou Ran houlha ni âyei paam hei touri tui hoiyankhi manpower (lhou toumal narou thimi) hoiya nungkhi phaarei nanung laaknarou. Koutoubi laaknarou toulanungri aayei paam project touri Maringnga folk song recording hoiya nungkhi, nimak kanung houlha phung hoiya nungkhi, dei dei   hoiya nungkhi heinak project ngamrou Hou Ran houlha ra katpi bangpilak. Maring Progressive Forum ni heinak project hei phungbini lhawai klei thimi rapnung pao phaayerrou.

4. Maringnga lhailik Archiving:
Maringnga yei lhourei phung lhailik maangkur kya, khman lhailik leiyanungri Maring Progressive Forum nung pao pipilo. Heinak lhailikrap heiya mangyermak nanung kani scan toubi computer hard diskra khourou. Computer hard  diskrei  khou  lhangainei  ngamri  hard  copy lhailikri khrangni chitkur,  nimak  kanung  mangkur  kya. Lhailik hei scan hek luibi suimakni malengpi roumeh.

Nanamyer nung MPF yei appeal:

Hou Ran houlha â hu deinung nimak, huweikhi nimak, kanammei houlha meh. Houlha âya mantrang laakpilak. Serious hoi issue rap yei ngamrou article mayebangpilak, phungeise. Phungkur article rapya paapilak, neinapilak, yanimak - yakni shunpilak. Phungkur   article rapbei ngamrou mot pibang pilak. Discuss toumal nawase, debate touwashi. Kouni lhangai-lhangaimak thimal nawase. Neiyei keiyei kmu, shunkni shunthut dasi, deirapbei shunkhi ningasi. Ka Maringnga rap, keitam tomnung khal donglakkase, wakhal mandimakkase. Maringnga chatie kayei kheen hunglunga meh. Nangri kouya khalleiyo?

Nanammei sepharou
“HOU RAN”

Lhoubam khat:
Houlha ârou wei kyao kchimmak lhou, wahei duini spelling kral kounak yaowa nungri marthing thutpilo. Heirouni houlha âya tangbang - choubang nanung nanammei kmu duini mukhei katyun pilo. Houlha heirou Maringnga lhou âya duini tangbang hoinanung. Nammei suggestion nimanung advice ya lhourolei.

Klu lhourap:
Kumka        -        January
Kumsa        -        February
Matrao        -        March
Lhou thuk   -        Event/happening/function
Lha              -        Image/Photo
Marnorap   -        Learners/Students
Hutthul       -        Present/Gift
Kulyom      -        Custom/Tradition
Yrengcha    -        Use
Rumpi        -        Help

Posted by No comments:
Subscribe to: Posts (Atom)